بھارت کشمیر کو قبرستان بناکر یہ نہ سوچے کہ امن قائم کردیا، مرتضیٰ سولنگی

نگراں وزیر اطلاعات مرتضیٰ سولنگی نے کہا ہے کہ کشمیری اپنے حق خودارادیت کے لیے جدوجہد کر رہے ہیں اور ہم ان کے ساتھ کھڑے ہیں۔ بھارت یہ نہ سمجھے کہ اس نے کشمیر کو قبرستان بنا کر کشمیر میں امن قائم کر لیا ہے۔اسلام آباد میں میڈیا سے گفتگو کرتے ہوئے مرتضیٰ سولنگی نے کہا کہ 1947 میں بھی کشمیریوں نے حق خود ارادیت کا مطالبہ کیا تھا۔مرتضیٰ سولنگی کا کہنا ہے کہ بھارت نے زبردستی الحاق کیا تب بھی کشمیر نے اس کے خلاف آواز اٹھائی۔وزیر اطلاعات نے کہا کہ انہوں نے 1987 کے نام نہاد الیکشن کے خلاف بھی آواز اٹھائی، یہ چوتھی نسل ہے جو اس ظلم کا شکار ہے۔واضح رہے کہ یوم یکجہتی کشمیر کے موقع پر دفتر خارجہ کی جانب سے ریلی نکالی گئی تھی جس کا اہتمام دفتر خارجہ نے کیا تھا۔ریلی کی قیادت سیکرٹری خارجہ سائرس سجاد قاضی اور ترجمان ممتاز زہرہ بلوچ نے کی، جس میں وفاقی وزراءمرتضیٰ سولنگی، جمال شاہ، انیق احمد اور فواد حسن فواد نے شرکت کی۔