بیرسٹر سیف کی سربراہی میں وفد کا شمالی وزیرستان کا دورہ

مشیرِ اطلاعات خیبر پختون خوا بیرسٹر محمد علی سیف کی سربراہی میں حکومتی وفد نے شمالی وزیر ستان کا دورہ کیا ہے۔خیبر پختون خوا حکومت کے وفد میں صوبائی وزیر پختون یار، چیف سیکریٹری اور آئی جی بھی شامل تھے۔وفد نے دورہ شمالی وزیرستان کے دوران یادگارِ شہدا پر حاضری دی اور شہدا کے بلند درجات کے لیے دعا کی۔اس موقع پر بیرسٹر سیف نے کہا کہ یہ دورہ وزیرِ اعلی علی امین گنڈاپور کی خصوصی ہدایت پر کیا گیا ہے، یہاں سول و ملٹری حکام نے وفد کو علاقے کی سیکیورٹی صورتِ حال پر بریفنگ دی ہے۔
انہوں نے کہا کہ سیکیورٹی سے متعلق قبائلی مشران کے ساتھ تفصیلی نشست کا بھی اہتمام کیا گیا ہے، دورے کا مقصد سیکیورٹی کی صورتِ حال کا جائزہ لینا ہے۔
بیرسٹر سیف نے کہا کہ امن کے قیام میں قبائلی عمائدین سمیت مقامی لوگوں کا موثر کردار ہے، دورے کے اختتام پر وزیرِ اعلی کوجامع رپورٹ پیش کی جائے گی۔