خیبر پختونخوا: سینیٹ کی 11 نشستوں پر انتخابات آج، 25 امیدوار آمنے سامنے

پشاور:مخصوص نشستوں پر ارکان کی حلف برداری کے بعد کے پی کا ایوان مکمل ہوگیا جس کے بعد خیبرپختونخوا اسمبلی میں سینیٹ کی 11 نشستوں پر الیکشن آج ہوگا۔سینیٹ الیکشن کیلئے الیکٹورل کالج مکمل ہوگیا، سینیٹر بننے کیلئے 25 امیدوار میدان میں ہیں، 145 ارکان اسمبلی ووٹ کاسٹ کریں گے۔
خیبر پختونخوا میں سینیٹ کی 11 نشستوں کیلئے پولنگ کا عمل صبح 11 بجے شروع ہوگا جو شام 4 بجے تک جاری رہے گا، الیکشن کیلئے کے پی اسمبلی کے جرگہ ہال کو الیکشن روم مقرر کیا گیا ہے اور اس موقع پر سکیورٹی کے بھی انتہائی سخت انتظامات کئے گئے ہیں۔خیبر پختونخوا میں سینیٹ الیکشن کے دوران ہارس ٹریڈنگ سے بچنے کیلئے حکومت اور اپوزیشن نے 6 اور 5 نشستوں کا فارمولا طے کیا ہے، فارمولے کے مطابق حکومت کے حصے میں 6 جبکہ اپوزیشن کے حصے میں 5 نشستیں آئیں گی۔
سینیٹ کی 7 جنرل، 2 خواتین اور 2 ٹیکنوکریٹ کی نشستوں پر 22 امیدوار میدان میں ہیں، 7 جنرل نشستوں پر 14 امیدوار قسمت آزمائی کریں گے، خیبرپختونخوا اسمبلی میں حکومتی ارکان کی تعداد 92 اور اپوزیشن کی 53 ہے۔مراد سعید پی ٹی آئی کی جانب سے جنرل نشست پر انتخابات میں حصہ لے رہے ہیں، نورالحق قادری اور فیصل جاوید آزاد حیثیت سے جنرل نشستوں پر پی ٹی آئی کے امیدوار ہیں۔
اس کے علاوہ مرزا محمد آفریدی آزاد حیثیت سے جنرل نشست پر پی ٹی آئی کے امیدوار ہیں، محمد طلحہ محمود جنرل نشست پر پیپلز پارٹی کے امیدوار ہیں جبکہ نیاز احمد جنرل نشست پر مسلم لیگ ن کے امیدوار ہیں۔خیبر پختونخوا میں خواتین کی 2 مخصوص نشستوں پر 3 خواتین امیدوار میدان میں ہیں، پیپلز پارٹی کی روبینہ خالد اور پی ٹی آئی کی روبینہ ناز بھی خواتین کی مخصوص نشستوں پر امیدوار ہیں جبکہ ماہ وش علی خان آزاد حیثیت سے خواتین کی مخصوص نشستوں پر امیدوار ہیں۔
خیبرپختونخوا میں سینیٹ الیکشن مقررہ وقت پر شروع نہ ہونے کا خدشہ ہے، اسمبلی کے تمام دروازوں کو تالے لگا کر بند کر دیا گیا ہے۔سٹاف کو کسی صورت بھی اسمبلی ہال کے دروازے نہ کھولنے کی ہدایت کی گئی ہے، الیکشن کمیشن نے سینیٹ الیکشن کی پولنگ کیلئے 11 بجے کا وقت مقرر کیا ہے۔