سری لنکا نے دنوشکا گوناتھلاکا پرعائد تمام پابندیاں ختم کردیں

کولمبو: سری لنکا نے ریپ کیس سے نجات پانے والے دنوشکا گوناتھلاکا پر عائد تمام پابندیاں ختم کر دیں، وہ اب کرکٹ سرگرمیوں میں حصہ لینے اور نیشنل ڈیوٹی کیلیے بھی اہل ہوں گے۔گزشتہ برس آسٹریلیا میں ٹی 20 ورلڈکپ کے دوران گوناتھلاکا پر ایک خاتون نے ریپ کا الزام عائد کیا، جس کی وجہ سے انھیں وہیں حراست میں لے لیا گیا تھا، بورڈ کی ڈسپلنری کمیٹی نے بھی ان پر پابندی عائد کردی تھی۔11 ماہ تک آسٹریلیا میں کیس لڑنے کے بعد گوناتھلاکا بے قصور قرار پائے، ان کی 3 اکتوبر کو وطن واپسی ہوچکی اور اب ڈسپلنری کمیٹی کی سفارش پر بورڈ نے ان پر کرکٹ سرگرمیوں میں حصہ لینے کی پابندی اٹھا دی، ساتھ ان پر واضح کیا ہے کہ مستقبل میں اپنے کسی عمل سے ملک کا نام بدنام نہ کریں۔