سوات میں امن و امان کی صورت حال کشیدہ، حکومت کیخلاف احتجاجی مظاہرے پھوٹ پڑے

سوات کے علاقے مینگورہ میں امن و امان کے قیام کے حق اور دہشت گردی کیخلاف احتجاجی مظاہرے میں ہزاروں کی تعداد میں عوام کی شرکت۔
تفصیلات کے مطابق مینگورہ کے نشاط چوک میں ہونے والے احتجاجی مظاہرے میں ہزاروں کی تعداد میں سول سوسائیٹی ،وکلاء اور صحافیوں سمیت دیگر افراد نے شرکت کی۔ مظاہرین نے ہاتھوں میں سفید جھنڈے اور پلے کارڈ اٹھا رکھے تھے جبکہ شرکا نے دہشتگردی کے خلاف فلک شگاف نعرے بازی کی ۔
مظاہرین کا کہنا تھاکہ سوات میں بےامنی برداشت نہیں کی جائےگی، شہریوں کو تحفظ دینا حکومت اور ریاستی اداروں کی ذمہ داری ہے۔
مظاہرین نے مطالبہ کیا کہ حکومت دہشت گردوں اور ان کے سر پرستوں کے خلاف کارروائی کرے۔
مظاہرے میں سے عوامی نیشنل پارٹی کے صوبائی صدر ایمل ولی، جماعت اسلامی کے سینیٹر مشتاق احمد، منظور پشتین اور افراسیاب خٹک سمیت دیگر نے خطاب کیا۔