اسلام آباد: وزیر اعظم شہباز شریف نے پیر کو متعلقہ حکام کو ہدایت کی ہے کہ شام سے پڑوسی ممالک کے راستے واپس جانے کے خواہشمند پاکستانیوں کے بحفاظت انخلا کے لیے جلد از جلد ایکشن پلان تشکیل دیا جائے۔
وزیر اعظم یہاں شام کی موجودہ صورتحال اور ملک میں موجود پاکستانیوں کے محفوظ انخلاء کے حوالے سے منعقدہ اجلاس کی صدارت کر رہے تھے۔ وزیر اعظم نے زور دیا کہ "شام سے پاکستانیوں کے محفوظ انخلاء کو یقینی بنانے کے لیے تمام ممکنہ اقدامات کیے جائیں۔”
شام میں پاکستانیوں کے جان و مال کا تحفظ ہماری اولین ترجیح ہے، وزیراعظم نے اس مقصد کے لیے تمام دستیاب وسائل بروئے کار لانے کی ہدایت کی۔ انہوں نے دمشق میں پاکستانی سفارتخانے کو پاکستانیوں کی سہولت کے لیے ایک انفارمیشن ڈیسک اور ایک ہیلپ لائن قائم کرنے کی بھی ہدایت کی۔ وزیر اعظم نے ہدایت کی کہ جب تک سیکیورٹی کی صورتحال بہتر نہیں ہوتی، وزارت خارجہ کا کرائسز مینجمنٹ یونٹ اور شام اور اس کے پڑوسی ممالک میں پاکستانی سفارت خانوں میں انفارمیشن ڈیسک چوبیس گھنٹے فعال رہیں۔ اجلاس میں نائب وزیراعظم محمد اسحاق ڈار، وزیر دفاع خواجہ محمد آصف، وزیر اقتصادی امور احد چیمہ، وزیر اطلاعات و نشریات عطاء اللہ تارڑ، معاون خصوصی طارق فاطمی اور متعلقہ محکموں کے اعلیٰ حکام نے شرکت کی۔
