نام کیساتھ حافظ کیوں لگایا،حفظ لوگوں کو بتانے کیلیے کیا ہے؟چیف جسٹس کا وکیل سے سوال

اسلام آباد: چیف جسٹس نے ایک مقدمے کی سماعت کے دوران وکیل سے پوچھا کہ نام کے ساتھ حافظ لگانے کی کیا ضرورت ہے؟ آپ نے حفظ لوگوں کو بتانے کے لیے کیا ہے یا اپنے ایمان کے لیے؟ سپریم کورٹ میں سرحد میڈیکل یونیورسٹی کی طالبہ کو ڈگری نہ دینے کے خلاف کیس کی سماعت ہوئی۔ چیف جسٹس کے پی ایم ڈی سی کے وکیل حافظ عرفات احمد سے دلچسپ مکالمہ ہوئے۔چیف جسٹس نے وکیل حافظ عرفات سے سوال کیا کہ کیا آپ کا نام حافظ ہے؟ جس پر وکیل نے کہا کہ نہیں میرا نام عرفات احمد ہے، چیف جسٹس نے پوچھا کہ آپ اپنے نام کے ساتھ حافظ کیوں لکھتے ہیں؟ اس پر وکیل نے کہا کہ شعوری عمر میں پہنچنے سے پہلے حفظ کر لیا تھا تو نام کے ساتھ حافظ کا اضافہ ہوگیا تاہم شناختی کارڈ پر نام صرف عرفات احمد ہے۔چیف جسٹس نے کہا کہ نام کے ساتھ حافظ لگانے کی کیا ضرورت ہے؟ آپ نے حفظ لوگوں کو بتانے کے لیے کیا ہے یا اپنے ایمان کے لیے؟ ایسے تو ثواب ضائع کرنے والی بات ہے۔بعدازاں عدالت نے ڈگری نہ دینے کے کیس میں پی ایم ڈی سی کا مقدمہ بحال کر دیا۔وکیل کے مطابق طالبہ آسیہ توقیر نے سرحد یونیورسٹی سے پبلک ہیلتھ میں ماسٹرز کیا لیکن خیبر میڈیکل یونیورسٹی ے ڈگری نہیں دی، سرحد یونیورسٹی میڈیکل پروگرامز کے لیے خیبر میڈیکل یونیورسٹی سے منسلک ہے، پی ایم ڈی سی نے 2012ء میں نوٹی فکیشن کے ذریعے سرحد یونیورسٹی کی میڈیکل ڈگریز کو روک دیا تھا۔چیف جسٹس پاکستان نے کہا کہ آپ نے خیبر میڈیکل یونیورسٹی کو فریق بنایا اور نہ ہی درخواست میں دستاویزات لگائے، ملک میں کتنی یونیورسٹیاں ہیں؟ پاکستان میں نیویارک اور لندن سے زیادہ یونیورسٹیاں ہیں، ملک میں عمارت دستیاب ہو نہ ہو بس یونیورسٹی بنا دیتے ہیں، کچھ لوگوں نے یونیورسٹیز بنانے کی کاوش کی تھی پتا نہیں اس کا کیا بنا۔عدالت نے فریقین کو اضافی دستاویزات جمع کرانے کا وقت دیتے ہوئے کیس کی سماعت ملتوی کردی۔