وزیراعظم فرانس روانہ ہوگئے، ایم ڈی آئی ایم ایف سے ملاقات متوقع

اسلام آباد: وزیراعظم شہباز شریف فرانس روانہ ہوگئے ہیں جہاں ان کی’’ نیوگلوبل فنانشل پیکٹ‘‘ کے حوالے سے 22 اور 23 جون کو پیرس میں ہونے والی سربراہی کانفرنس میں آئی ایم ایف کی مینجنگ ڈائریکٹر کرسٹالینا جارجیوا سے ملاقات بھی متوقع ہے۔وفاقی کابینہ کے ایک رکن نے ایکسپریس ٹریبیون کو بتایا کہ پاکستان نے کرسٹالینا جارجیو سے کانفرنس کی سائیڈ لائن پر ملاقات کی درخواست کر رکھی ہے۔ وفاقی وزیراطلاعات مریم اورنگزیب سے اس بارے میں جب پوچھا گیا تو انہوں نے اس کا کوئی جواب نہیں دیا۔وزیراعظم شہبازشریف اس سے قبل ساڑھے چھ ارب ڈالر کے آئی ایم ایف پروگرام کی بحالی کیلئے عالمی مالیاتی فنڈ(آئی ایم ایف) کی مینجنگ ڈائریکٹر پر فون سے بات چیت کے علاوہ انہیں تین خطوط بھی لکھ چکے ہیں۔فرانس میں ہونے والی ’’ نیوگلوبل فنانشل پیکٹ‘‘ کانفرنس میں ماحولیاتی تبدیلیوں ،توانائی،صحت عامہ اور اقتصادی مشکلات کا شکار خاص طور پر قرضوں میں ڈوبے ہوئے ممالک کی بحالی پرغور کے علاوہ ان کی قلیل مدتی مشکلات پر قابو پانے میں مددکا جائزہ لیا جائے گا۔وزارت خزانہ کی طرف سے جاری اعدادوشمار کے مطابق رواں مالی سال کے دوران پاکستان کو ملنے والے عالمی قرضوں کی مالیت بڑی حد تک کم ہوکر بمشکل 8.4 ارب ڈالر رہ گئی ہے جو گزشتہ سال ملنے والی قرضوں کے مقابلے میں 37 فیصد کم ہے۔ایسا آئی ایم ایف کی طرف سے پروگرام بحال نہ کرنے کی وجہ سے ہوا ہے کیونکہ اس کے بعد دوسرے ممالک اور عالمی ادارے بھی امداد نہیں دے رہے۔حکومت پاکستان نے رواں مالی سال کے دوران بجٹ خسارہ پورا کرنے کیلیے 19.1 ارب ڈالر قرضے ملنے کا تخمینہ لگایا تھا لیکن اسے صرف 5.5 ارب ڈالر قرضے مل سکے۔اس کا سب سے برا اثر پاکستان کے سرکاری زرمبادلہ کے ذخائر پر پڑا ہے جوگھٹ کر صرف ساڑھے تین ارب ڈالر رہ گئے ہیں اور صرف ایک ماہ کی درآمدات کیلیے کافی ہیں۔رواں مالی سال کے دوران ایشیائی ترقیاتی بینک نے پاکستان کو سب سے زیادہ قرضہ دیا جو 2 ارب ڈالر تھا۔ورلڈ بینک نے بھی ڈیڑھ ارب ڈالر دیئے جبکہ اس سے 2.6 ارب ڈالر ملنے کی امید تھی۔پاکستان کوRISE-II اور PACE-II پروگراموں کے تحت ملنے والی ایک ارب 10 کروڑ ڈالر کی امداد بھی نہیں مل سکی۔البتہ ایشین انفرااسٹرکچر بینک کی طرف سے پاکستان کو55 کروڑ 30 لاکھ ڈالر امداد مل گئی جو متوقع امداد 54 کروڑ 20 لاکھ ڈالر سے زیادہ تھی۔