ٹام کروز نے مشن امپاسیبل 7 کے دل دہلا دینے والے مناظر کی ویڈیو شیئر کر دی

نیویارک: ہالی ووڈ کے عالمی شہرت یافتہ اداکار ٹام کروز نے اپنی آنے والی نئی فلم مشن امپوسیبل 7 ڈیڈ ریکننگ پارٹ ون کی شوٹنگ کے مناظر پر مشتمل ویڈیو شیئر کردی۔ٹام کروز کی جانب سے سوشل میڈیا پر شیئر کی گئی اس ویڈیو میں ان کی فلم کے دل دہلا دینے والے مناظر دکھائے گئے ہیں جس کے تمام ایکشن اسٹنٹس ٹام کروز نے خود کئے ہیں۔ویڈیو میں دیکھا جاسکتا ہے کہ وہ فلم میں ویلن کے ساتھ برق رفتار چلتی ٹرین کی چھت پر لڑائی کر رہے ہیں جبکہ راستے میں آنے والے ٹرین کے ایک پُل کو بم سے اُڑا دیا جاتا ہے جس کی وجہ سے ٹرین اس پُل سے کھائی میں جا گرتی ہے۔ٹام کروز تباہ ہونے والی ٹرین کی بوگی سے نکل کر ٹرین کے دوسرے حصے پر لٹک جاتے ہیں اور کھائی میں گرنے سے بچ جاتے ہیں۔سنسنی سے بھرپور اس ویڈیو کو شیئر کرتے ہوئے ٹام کروز نے کیپشن میں لکھا کہ ’ ٹرین کی یہ ترتیب مشکل تھی، لیکن نتائج نے یہ سب کچھ بہترین اور قابل بنا دیا، مجھے بےصبری سے انتظار ہےکہ مداح جلد یہ دیکھیں۔‘ٹرین ایکشن پر مبنی یہ سین ناروے میں فلمایا گیا جبکہ اسی سین کے دوران ریل گاڑی کے کھائی میں گر کر تباہ ہونے والے حادثے کو برطانیہ میں فلمایا گیا۔