پشاور میں بارودی مواد کی منتقلی کے دوران دھماکہ ، 2 دہشگرد ہلاک

پشاور میں دہشت گردی کا بڑا منصوبہ ناکام، بورڈ بازار میں دھماکے کے دوران 2 دہشت گرد مارے گئے۔پولیس کے مطابق خیبرپختونخوا کے ضلع پشاور کے سرحدی بازار ناصر باغ روڈ پر موٹر سائیکل پر جاتے ہوئے بارودی مواد پھٹنے سے 2 دہشت گرد ہلاک اور ایک کو زخمی حالت میں گرفتار کر لیا گیا۔ایس ایس پی آپریشنز کاشف آفتاب عباسی کا کہنا تھا کہ ابتدائی تحقیقات کے مطابق دھماکے میں 4 سے 5 کلو گرام بارودی مواد استعمال کیا گیا، خودکش حملے کے شواہد نہیں ملے، بارودی مواد ایک جگہ سے دوسری جگہ منتقل کرتے ہوئے پھٹ گیا۔کاشف آفتاب کا کہنا ہے کہ تینوں دہشت گرد ایک ہی موٹر سائیکل پر سوار تھے، جن کی شناخت ہوگئی ہے، تینوں دہشت گرد سی ٹی ڈی کو مطلوب ہیں اور ان کا تعلق پشاور سے ہے۔ریسکیو 1122، سی ٹی ڈی اور بی ڈی یو نے موقع پر پہنچ کر علاقے کو گھیرے میں لے لیا اور موقع سے موبائل فون اور اہم شواہد اکٹھے کر لیے۔واضح رہے کہ گزشتہ روز شمالی وزیرستان میں سیکیورٹی فورسز کی دو مختلف کارروائیوں میں سرحد پار سے آنے والے دہشت گردوں سمیت 10 شدت پسند ہلاک اور 3 زخمی ہوگئے تھے۔دوسری جانب وزیراعظم شہباز شریف نے پشاور بورڈ بازار کے قریب دھماکے کی شدید مذمت کرتے ہوئے کہا کہ دہشت گردی کو جڑ سے ختم کرنے کے لیے پرعزم ہیں۔دوسری جانب وزیراعلیٰ خیبرپختونخوا علی امین گنڈا پور نے بورڈ بازار دھماکے کی مذمت کرتے ہوئے آئی جی پولیس سے رپورٹ طلب کرلی۔