اسلام آباد : بین الاقوامی مالیاتی فنڈ نے حکومت کی جانب سے اعلان کردہ پیٹرول سبسڈی اسکیم پر تحفظات کا اظہار کردیا۔ذرائع کے مطابق آئی ایم ایف کی نمائندہ ایستھر پیریز روئز نے ایک مقامی اخبار کے جواب میں کہا کہ پٹرول پر سبسڈی دیئے جانے کے حوالے سے آئی ایم ایف سے کوئی مشاورت نہیں کی۔
آئی ایم ایف کے نمائندہ خصوصی کا کہنا تھا کہ فنڈ کو اس آپریشن، لاگت، ہدف، غلط استعمال کے خلاف تحفظات ہیں، پاکستانی حکام کی جانب سے کئے جانے والے ان اقدامات کے بارے میں مزید تفصیلات طلب کر رہے ہیں۔انکا مزید کہنا تھاکہ آئی ایم ایف کی جانب سے غیر فنڈ شدہ اور غیر ہدف شدہ سبسڈیز کو پہلے ہی مسترد کیا جا چکا ہے.ایستھر پیریز روئز کا کہنا تھا کہ اب تک پاکستان نے آئی ایم ایف کے ساتھ کئے گئے وعدوں کو پورا کرنے میں کافی پیش رفت کی ہے۔
خیال رہے وزیر اعظم پاکستان شہباز شریف نے غریبوں کے لیے اتوار کوپچاس روپے فی لیٹر پٹرول پر سبسیڈی دینے کا اعلان کیا تھا۔اسلام آباد میں ریلیف پیکج پر جائزہ اجلاس کی صدارت کرتے ہوئے وزیر اعظم پاکستان نے کہا کہ پٹرولیم ریلیف کم آمدنی والے صارفین کو دیا جائے گا جن کے پاس موٹرسائیکل، رکشہ، 800 سی سی کاریں اور دیگر چھوٹی کاریں ہیں۔
