سینئر حریت رہنما الطاف احمد شاہ شہید کر دئے گئے

قابض بھارتی فوج نے بدترین سفاکیت کا مظاہرہ کرتے ہوئے دوران حراست نظر بند کل جماعتی حریت کانفرنس کے سینئر رہنما الطاف احمد شاہ کو شہید کردیا ہے۔
کشمیر میڈیا سروس کے مطابق بھارت کے بدنام زمانہ تہاڑ جیل میں نظر بند کل جماعتی حریت کانفرنس کے غیر قانونی طور پر نظر بند سینئر رہنما الطاف احمد شاہ نے بھارتی حراست میں جام شہادت نوش کر لیا۔
الطاف احمد شاہ، جو تحریک آزادی کشمیر کے آئیکن شہید سید علی گیلانی کے داماد تھے، 2017 میں گرفتاری کے بعد نئی دہلی کی بدنام زمانہ تہاڑ جیل میں بند تھے۔ انہوں نے پیر کی رات دیر گئے ایمس اسپتال، نئی دہلی میں آخری سانس لی، انہیں گردوں کے کینسر کے آخری مرحلے کی تشخیص ہوئی تھی جو ان کے جسم کے دیگر حصوں میں پھیل چکا تھا۔
الطاف شاہ کو بھارتی قابض فوج نے جھوٹے مقدمے میں گرفتار کرنے کے بعد تہاڑ جیل منتقل کیا تھا، دوران حراست انہیں گردوں کے کینسر کی تشخیص ہوئی جو کہ آخری اسٹیج پر تھی۔
موذی مرض میں مبتلا ہونے کے باوجود بھارتی فوج نے انہیں علاج معالجے کی سہولیات سے محروم رکھا جس کے باعث ان کی صحت دن بدن خراب رہنے لگی آخر کار وہ خالق حقیقی سے جاملے۔
واضح رہے کہ تیس ستمبر کو ان کی بیٹی رووا شاہ نے ایک ٹوئٹ کے زریعے بھارتی حکومت سے انسانی ہمدردی کی بنیاد پر انہیں ضمانت پر رہا کرنے کی اپیل کی تھی جسے وزیراعظم مودی اور وزیر داخلہ امیت شاہ کی ایما پر مسترد کردیا گیا۔
یاد رہے اس سے قبل سید علی گیلانی گزشتہ برس یکم ستمبر کو اپنی رہائش گاہ پر ایک دہائی سے زائد عرصے تک نظر بندی کے دوران انتقال کر گئے تھے۔
اس کے علاوہ کل جماعتی حریت کانفرنس کے سینئر رہنما 77سالہ محمد اشرف صحرائی جو سید علی گیلانی کے قریبی ساتھی تھے وہ بھی گزشتہ سال 5 مئی کو جموں کی ایک جیل میں انتقال کر گئے تھے۔
محمد اشرف صحرائی کالے قانون پبلک سیفٹی ایکٹ کے تحت جیل میں قید تھے جس کے تحت حکام کسی شخص کو عدالت میں پیش کئے بغیر دو سال تک حراست میں رکھاجاسکتا ہے ۔
وزیراعظم محمد شہبازشریف نے معروف کشمیری حریت رہنما اور حریت سید علی گیلانی کے داماد الطاف احمد شاہ کے بھارت کی قید میں انتقال پرگہرے دکھ اور افسوس کااظہار کیاہے۔