لاہور: 2025 کی چیمپئنز ٹرافی کے انتظامات کا جائزہ لینے کے لیے پاکستان کا دورہ کرنے والا آئی سی سی کا وفد واپس دبئی پہنچ گیا۔
آئی سی سی کی پانچ رکنی معائنہ ٹیم نے کراچی، راولپنڈی اور لاہور میں تیاریوں کا جائزہ لیا، حفاظتی اقدامات، لاجسٹکس، ہوٹل میں رہائش، پریکٹس کے مقامات اور تینوں اسٹیڈیموں میں اپ گریڈ پر توجہ دی۔ سینئر ایونٹ منیجر سارہ ایڈگر، ایونٹ منیجر عون محمد زیدی، کرکٹ کے جنرل منیجر وسیم خان اور سیکیورٹی منیجر ڈیوڈ مسکر دبئی واپس پہنچ گئے ہیں جبکہ آئی سی سی کے براڈکاسٹ کنسلٹنٹ منصور منج پاکستان میں ہی قیام پذیر ہیں۔ اپنے دورے کے دوران پی سی بی حکام نے لاہور کے قذافی سٹیڈیم میں بڑے تعمیراتی منصوبوں کے بارے میں تفصیلی بریفنگ دی۔
پی سی بی کے چیئرمین محسن نقوی نے معائنہ ٹیم کو مثالی سیکیورٹی انتظامات کی یقین دہانی کرائی۔ آئی سی سی کی ٹیم نے سکیورٹی اور دیگر انتظامات کو تسلی بخش قرار دیا۔
