بنوں آپریشن میں پاک فوج کے 3 شہداء کی تفصیلات جاری

پاک فوج نے گزشتہ روز بنوں میں آپریشن کے دوران پاک فوج کے شہید ہونے والے میجر اور 2 جوانوں سے متعلق تفصیلات جاری کر دیں۔پاک فوج کے شعبہ تعلقاتِ عامہ (آئی ایس پی آر) کے مطابق پاک فوج کے میجر عاطف خلیل شہید نے 8 سال سے زائد عرصے تک دفاعِ وطن کا مقدس فریضہ سر انجام دیا۔میجر عاطف خلیل شہید کے سوگواران میں والدین، بہن بھائی، اہلیہ اور ایک بیٹی شامل ہے۔آئی ایس پی آر کے مطابق نائیک آزاد اللہ شہید نے پاک فوج میں 15 سال وطنِ عزیز کا دفاع کیا، ان کے سوگواران میں اہلیہ، 2 بیٹے اور بیٹی شامل ہیں۔نائیک غضنفر عباس شہید نے 14 سال تک پاکستان کے دفاع کا فریضہ سر انجام دیا۔آئی ایس پی آر کے مطابق نائیک غضنفر عباس شہید کے سوگواران میں اہلیہ، بیٹی اور ایک بیٹا شامل ہیں۔واضح رہے کہ گزشتہ روز سیکیورٹی فورسز کے بنوں میں آپریشن کے دوران 8 خوارج ہلاک ہوئے تھے جبکہ پاک فوج کے میجر اور 2 جوان شہید ہوئے تھے۔