جیمز بانڈ سیریز کا اداکار 89 سال کی عمر انتقال کرگیا

جیمز بانڈ سیریز میں 10 سال تک شاندار پرفارمنس دینے والے اداکار جو ڈان بیکر 89 سال کی عمر میں انتقال کرگئے۔
فلم اور ٹی وی دونوں شعبوں میں فن مہارت رکھنے والے باصلاحیت اداکار جو ڈان بیکر نے 2012 میں اپنی فلم مڈ کی ریلیز کے ساتھ ہی ریٹائرمنٹ کا اعلان کردیا تھا۔
جو ڈان بیکر کو واکنگ ٹال اور 1987 سے 1997 کی جیمز بانڈ سیریز کی 3 فلموں میں شاندار پرفارمنس کی بدولت شہرت ملی۔
ٹیکساس میں 1936 میں پیدا ہونے والے جو ڈان بیکر نے47 سال بطور اداکار پرفارمنس دی، وہ مداحوں کیلئے یاد گار فنی وراثت چھوڑ گئے ہیں۔
انہوں نے 1965 میں ہالی ووڈ میں بطور اداکار فلمی کیرئیر کا آغاز کیا اور 2012 میں ریٹائرمنٹ کا اعلان کیا، نارتھ ٹیکساس اسٹیٹ کالج سے بزنس ایڈمنسٹریشن کی ڈگری لی اور پھر 2 سال امریکی فوج میں خدمات انجام دیں۔
بعد ازاں انہوں نے نیو یارک سٹی میں اداکاری کی تربیت حاصل کی اور 1965 میں ٹی وی سیریز ہنی ویسٹ سے ڈیبیو کیا، ان کی کامیابی کا سفر 1973 میں واکنگ ٹال سے شروع ہوا۔
جو ڈان بیکر نے جیمز بانڈ سیریز میں 1987 میں دی لیونگ ڈے لائٹس، 1995 میں گولڈن آئی اور 1997 میں ٹومارو نیور ڈائیز میں اداکاری کے جوہر دکھائے، جنہیں مداحوں نے خوب پسند کیا۔
وہ برطانوی منی سیریز ایج آف ڈارکنیس میں شاندار پرفارمنس پر بافٹا ایوارڈ کیلیے بھی نامزد کیے گئے تھے، جو ڈان بیکر 11 سال شادی شدہ رہے لیکن ان کی کوئی اولاد نہ تھی۔