اسلام آباد — پاکستان تحریک انصاف (پی ٹی آئی) نے ہفتے کے روز مخصوص نشستوں کے معاملے پر وضاحت کے لیے سپریم کورٹ سے رجوع کیا۔
درخواست پی ٹی آئی چیئرمین بیرسٹر گوہر نے ایڈووکیٹ عزیر کرامت کے ذریعے دائر کی۔ یہ درخواست قومی اسمبلی اور پنجاب اسمبلی کے اسپیکرز کی جانب سے مخصوص نشستوں کے معاملے پر الیکشن کمیشن آف پاکستان کو خط لکھے جانے کے چند دن بعد پیش کی گئی تھی۔ پی ٹی آئی چیئرمین نے اپنی درخواست میں کہا کہ ‘قومی اسمبلی اور پنجاب اسمبلی کے اسپیکرز کے لکھے گئے خطوط سے 12 جولائی کے مختصر آرڈر پر کوئی اثر نہیں پڑے گا۔
بیرسٹر گوہر نے کہا کہ الیکشن کمیشن کو دونوں اسپیکرز کے لکھے گئے خطوط کو نظر انداز کرنا چاہیے۔ درخواست میں کہا گیا کہ ‘ای سی پی سپریم کورٹ کے 14 ستمبر کے وضاحتی حکم کی روشنی میں 12 جولائی کے حکم پر عمل درآمد کرنے کا پابند ہے۔ پی ٹی آئی کے چیئرمین نے کہا کہ ای سی پی کو کسی اور سیاسی جماعت کو مخصوص نشستیں الاٹ کرنے سے روکنا چاہیے جب تک یہ کیس سپریم کورٹ میں زیر التوا ہے۔ یہاں یہ امر قابل ذکر ہے کہ سپیکر قومی اسمبلی سردار ایاز صادق نے الیکشن کمیشن کو خط لکھ کر ترمیم شدہ الیکشن ایکٹ کی روشنی میں پارٹیوں کو مخصوص نشستیں الاٹ کرنے کا مطالبہ کیا تھا۔ یہ بھی پڑھیں: الیکشن ایکٹ میں ترمیم کے بعد مخصوص نشستوں پر سپریم کورٹ کے فیصلے پر عملدرآمد نہیں ہوسکتا، اسپیکر قومی اسمبلی
انہوں نے کہا کہ الیکشن ایکٹ میں ترمیم کے بعد مخصوص نشستوں پر سپریم کورٹ کے فیصلے پر عملدرآمد نہیں ہو سکتا۔ خط میں سپیکر ایاز صادق نے چیف الیکشن کمشنر کو کہا کہ الیکشن ایکٹ میں ترمیم کے بعد مخصوص نشستوں کو تبدیل نہیں کیا جا سکتا۔ انہوں نے کہا کہ الیکشن ایکٹ اس وقت نافذ العمل ہے لہٰذا الیکشن کمیشن پارلیمنٹ کے بنائے ہوئے قانون پر عملدرآمد کرے اور جمہوریت اور پارلیمانی بالادستی کے اصولوں پر کاربند رہے۔ انہوں نے لکھا کہ سیاسی جماعت میں شامل ہونے والا آزاد رکن ترمیم شدہ الیکشن ایکٹ کے تحت پارٹیاں تبدیل نہیں کر سکتا۔ ترمیم شدہ الیکشن ایکٹ کا اطلاق 2017 سے سابقہ طور پر کیا گیا ہے اور اس پر عملدرآمد الیکشن کمیشن کی آئینی اور قانونی ذمہ داری ہے۔
