بشری کو کوئی چھوڑ کر نہیں گیا، ان سمیت سب بھاگے تھے: خواجہ آصف

وزیر دفاع خواجہ آصف نے کہا ہے کہ اسلام آباد میں ہونے والے دھرنے میں پاکستان تحریک انصاف کے بانی عمران خان کی اہلیہ بشری بی بی کو کوئی چھوڑ کر نہیں گیا بلکہ ان سمیت سب بھاگے تھے۔ گفتگو کرتے ہوئے خواجہ آصف نے کہا کہ سول نافرمانی ناکام ہو جائے گی، سول نافرمانی تب کامیاب ہوتی ہے جب عوام کا انحصار ریاست پر نہ ہو، اب ریاست عوام کو ہر چیز مہیا کر رہی ہے، اس سے قبل بھی بانی پی ٹی آئی نے دھرنے میں بل جلایا تھا، تب بھی کسی نے عمل نہیں کیا تھا۔ایک اور سوال کا جواب دیتے ہوئے خواجہ آصف نے کہا کہ بشری بی بی کو کوئی چھوڑ کر نہیں گیا، ان سمیت سب بھاگے تھے، انہوں نے ویڈیو دیکھی ہے، بشری بی بی خود جا رہی تھیں۔دوسری جانب وفاقی وزیر برائے منصوبہ بندی احسن اقبال نے بھی سول نافرمانی پر بات کرتے ہوئے کہا کہ جس ملک میں انتشار ہوگا، سول نافرمانی ہوگی وہ ملک ترقی نہیں کر سکتا، سیاسی اختلاف ضرور ہوتا ہے لیکن ملک کو بدنام کرناسازش ہے، اگر ہمیں ترقی یافتہ بننا ہے تو امن، استحکام، پالیسیز کے تسلسل اور اصلاحات کو اپنانا ہوگا۔واضح رہے کہ تین روز قبل بشری بی بی نے دھرنے کے دوران جاں بحق ہونے والے کارکن کے گھر جا کر تعزیت کی تھی اور میڈیا سے گفتگو کرتے ہوئے کہا تھا کہ شہادتوں کی وجہ سے تکلیف میں تھی، میں بھاگنے والی عورت نہیں ہوں، مجھے ڈی چوک پر اکیلا چھوڑ دیا گیا تھا، سمجھ نہیں آرہا تھا لوگ جھوٹ کیوں بول رہے تھے۔ادھر خیبرپختونخوا کے وزیراعلی علی امین گنڈا پور نے بشری بی بی کے اکیلے چھوڑے جانے کے دعوے کی تردید کرتے ہوئے ان کے بیان کو ذاتی قرار دیا اور کہا کہ میں پورا وقت بشری بی بی کے ساتھ تھا۔