شرابی اور نشئی کی زندگی

پاکستان یا اسلامی ممالک میں شراب کا نشہ کرنے والوں کو نہ صرف برا سمجھا جاتا ہے بلکہ ان سے میل، جول، تعلقات اور لین دین کو بھی حقارت کی نگاہ سے دیکھا جاتا ہے مگر ستم ظریفی یہ ہے کہ پاکستان کی اشرافیہ اور ایلیٹ کلاس شراب پینے والے کو پروگرسیو اور ترقی پسند ماڈرن سمجھتے ہیں پہلے یہ شغل سیاستدانوں ، بیوروکریٹس کا ہوتا تھا پھر اس میں اداکار، فن کار بھی شامل ہو گئے اب ہمارے میڈیا میں(سب نہیں ) بھی شراب کلچر عام ہے اور جو لوگ شراب پیتے ہیں اور نہ پینے والے کو پسماندہ سمجھتے ہوئے اس کے خلاف باتیں کرتے ہیں اسے محدود سوچ وفکر کا آدمی سمجھا جاتا ہے ۔قران مجید کی سورة المائدہ کی آیت نمبر 90 میں ارشاد باری تعالیٰ ہے۔ "اے ایمان والو!بےشک شراب، جوا، بتوں کے چڑھاوے اور پانسے (قسمت آزمانے کے تیر)ناپاک شیطانی کام ہیں، سو ان سے بچو تاکہ تم فلاح پاو¿ ۔ ” مسلمان ہوتے ہوئے شراب پینے کا معاملہ قرآن پاک کے حکم کو نعوذباللہ نہ صرف جھٹلانا ہے بلکہ اللہ تعالیٰ کی ناراضگی بھی مول لیتا ہے اللہ تعالیٰ کی خوشنودی اور رضا حاصل کرنا ہر مسلمان مرد ،عورت، بوڑھے اور جوان کےلئے ضروری ہے۔جن ہمارے پاکستانی مسلمانوں کو شراب کے نشے کی لت لگ گئی ہے وہ اکثر یہ کہتے ہیں کہ یہ تو ان کا ذاتی نجی معاملہ ہے اور اس کا جواب انہوں نے اللہ تعالیٰ کو خود ہی دینا ہے مغربی ممالک میں شراب خانے اور شرابی عام ہیں یہ ایک منافع بخش کاروبار ہے اس معاشرے میں شراب کی وجہ سے اخلاقی، معاشی،قانونی خاندانی اور سماجی طور پر بہت ساری برائیوں نے جنم لے رکھا ہے۔ اکثر لڑائیاں شراب کی وجہ سے ہوتی ہیں،یہ ہر روز شراب پی کر گاڑی چلاتے ہوئے پولیس کے ہاتھوں پکڑے جاتے ہیں ایکسیڈنٹ کرتے ہیں اپنی اور دوسروں کی زندگیاں خطرے میں ڈالتے ہیں ۔ میرے ساتھ خود اسی طرح کا حادثہ پیش آیا تھا جب میری کار کو ایک ڈرنک لاری ڈرائیور نے ٹکر مار دی تھی جس کو بعد میں جیل کی سزا بھی ہوئی تھی۔ برطانیہ و یورپ میں الکوحل اور نشے سے دھت لوگ یا تو خود تشدد کا شکار ہوتے ہیں یا دوسروں پر تشدد کرتے ہیں اکثر خاندانی نظام کی تباہی میں نشے کا بڑا عمل دخل ہے سڑکوں پر اکثر نشے میں دھت لوگ سڑکوں پر گر کر زخمی یا مر جاتے ہیں ہر ویک اینڈ جمعہ، ہفتہ اور اتوار کو صرف لندن میں ان کی وجہ سے سینکڑوں حادثات ہوتے ہیں ہسپتالوں ایمرجنسی سروسز میں بھی رش بڑھ جاتا ہے۔ نشے کے عادی لوگ اپنی صحت کےساتھ بھی کھلواڑ کرتے ہیں زیادہ دیر تک نشہ کرنے والا شخص جگر کے عارضے اور دیگر بیماریوں میں مبتلا ہوجاتا ہے جبکہ اس کا دماغ بھی بہت بری طرح متاثر ہوتا ہے مجھ پر یہ حقیقت 2001میں اس وقت آشکار ہوئی جب مجھے پاکستان سے برطانیہ واپسی پر ہیپاٹائٹس ہوا تھا اور میرا علاج لندن کے رائل فری ہسپتال میں کیا گیا تھا اس ہسپتال میں زیادہ تر مریض جگر کے عارضے میں مبتلا تھے ہیپاٹائٹس بھی جگر کو نقصان پہنچاتا ہے ۔ بعض ہمارے لوگ اس لعنت کی عادت کی وجہ یہ بتلاتے ہیں کہ ڈاکٹر نے دوائی کی طور پر استعمال کرنے کا کہہ رکھا ہے ۔ برطانیہ میں 1950کے بعد جو پاکستانی و کشمیری یہاں آئے ان سے سے متعلق بہت سارے لطیفے اور کہانیاں بیان کی جاتی ہیں لیکن ایک سچا واقعہ بیان کرنا شاید مناسب ہوگا میرے ایک بزرگ جو اس دنیائے فانی سے پردہ فرما گئے ہیں انہوں نے مجھے بتایا تھا کہ وہ جب برطانیہ مزدور بن کر آئے تو پیٹربرا کی ایک فیکٹری میں انہیں کام ملا جبکہ رہائش باقی ایک درجن ساتھیوں کے ساتھ تین کمروں کے ایک گھر میں ملی تھی۔ ہر روز فیکٹری میں کام کرنے کے بعد ان باقی ایک درجن لوگوں میں جب وہ شام کو اپنی رہائش گاہ پر واپس لوٹتے تو ان میں سے ایک شخص جس کا تعلق بھی پاکستان سے تھا وہ ان میں سے قدرے پڑھا لکھا تھا اور انگریزی سمجھتا تھا روزانہ ایک ڈبہ لے آتا اور پی کر مزے سے سو جاتا -اسکے باقی ایک درجن ساتھی اس سے روزانہ پوچھتے کہ یہ تم کیا پیتے ہو؟ وہ جان بوجھ کر ٹال مٹول سے کام لیتا ایک دن تنگ آکر اس نے انہیں بتایا کہ فیکٹری میں چونکہ دھول زیادہ ہے اس لئے وہ ایک ڈبہ دھول کی دوائی کی طور پر پیتا ہے اس نے انہیں یہ نہیں بتایا کہ وہ دراصل شراب پیتا تھا پھر اس نے سب کو کافی عرصے تک ایک ایک ڈبہ دھول کی دوائی بتا کر شراب پلائی ،اسی دوران ان میں ایک شخص کی موت واقع ہوگئی تو باقی سب نے موت کا سبب جب جاننا چاہا تو اس شخص نے باقی سب اپنے ساتھیوں کو بتایا کہ اس کی موت کا سبب فیکٹری کی دھول ہے لہٰذا سب کو مشورہ دیا کہ مقدار بڑھا دو ،پھر سب ایک کی بجائے دو دو ڈبے پینے میں لگ گے کافی عرصے تک وہ سب انجانے میں وہ اسے دھول کی دوائی سمجھ کر پیتے رہے۔ میرے اس بزرگ دوست مرحوم کو اپنی عمر کے آخری وقت تک انجانے میں فیکٹری کے دور میں شراب کے ڈبے پینے پر ہمیشہ پچھتاوا رہا وہ اللہ تعالیٰ سے معافی مانگتے رہے ہیں اللہ مغفرت فرمائے آمین۔سورہ المائدہ کی آیت 90کی تشریح اور خلاصہ کچھ طرح ہے ،یہ آیت ان چیزوں کے بارے میں ایک واضح حکم دیتی ہے جو اسلامی شریعت میں حرام اور نقصان دہ سمجھی جاتی ہیں۔ اس میں چار بنیادی برائیوں کا ذکر کیا گیا ہے:1. خمر: ہر وہ نشہ آور چیز جو عقل کو متاثر کرے اور انسان کے شعور کو زائل کر دے ۔ شراب انسان کو اللہ کی یاد سے غافل کر دیتی ہے ، لڑائی جھگڑوں اور دیگر سماجی برائیوں کو جنم دیتی ہے۔2.جوا: قسمت آزمانے کا ایسا عمل جس میں بغیر محنت کے نفع یا نقصان ہو۔ یہ حرص، دشمنی، اور نفرت کو فروغ دیتا ہے اور معاشی ناہمواری کو بڑھاتا ہے۔3.بتوں کے چڑھاوے:وہ پتھر یا بت جن کی پوجا کی جاتی تھی اور جن پر قربانیاں دی جاتی تھیں۔ یہ شرک کا ایک ذریعہ تھا، جس سے لوگوں کو غیر اللہ کی عبادت میں مبتلا کر دیا جاتا تھا۔4.پانسے یا قسمت آزمانے کے تیر (ازلام) زمانہ جاہلیت میں لوگ اپنے فیصلے کرنے کےلئے تیروں یا دیگر ایسے طریقوں سے قسمت آزماتے تھے جو توکل علی اللہ کے خلاف ہے اور توہم پرستی کو فروغ دیتا ہے ۔ان چاروں چیزوں کو "رجس من عمل الشیطان(ناپاک اور شیطانی عمل)قرار دیا گیا ہے، یعنی یہ برائیاں انسانی اخلاق اور معاشرت کےلئے نقصان دہ ہیں۔اللہ تعالیٰ نے حکم دیا ہے کہ فاجتنبوہ(ان سے بچو)یعنی ان کے قریب بھی نہ جا۔ یہ ممانعت اس قدر سخت ہے کہ کسی بھی درجے میں ان سے تعلق رکھنا منع کر دیا گیا۔ان سے اجتناب کا مقصد "لعلکم تفلحون” (تاکہ تم فلاح پا)بتایا گیا ہے، یعنی دنیا اور آخرت میں کامیابی حاصل کرنے کےلئے ان چیزوں کو چھوڑنا ضروری ہے۔اسلام نے شراب، جوا اور دیگر مذکورہ برائیوں کو صرف ذاتی معاملات تک محدود نہیں رکھا بلکہ اجتماعی و معاشرتی فلاح کے پیش نظر ان کی سختی سے ممانعت کی ہے ۔ جدید دور میں بھی شراب اور نشہ آور اشیا کی تباہ کاریاں واضح ہیں، اور جوا لوگوں کی معیشت کو برباد کر دیتا ہے ۔ قسمت آزمائی کے مختلف طریقے، جیسے لاٹری، سٹہ بازی اور دیگر حرام ذرائع، اسلامی تعلیمات کے منافی ہیں۔شرک اور بدعات سے بچنے کی سخت تاکید کی گئی ہے تاکہ اللہ کی توحید پر مضبوطی سے ایمان رکھا جائے۔