اسلام آباد:متحدہ عرب امارات کے صدر کا پہلا دورہِ پاکستان سفارتی تعلقات میں نئی جہت ہے، شاندار تاریخی استقبال کیا جائے گا۔متحدہ عرب امارات کے صدر شیخ محمد بن زاید ال نہیان آج پاکستان کا دورہ کر رہیہیں، برادر اسلامی ملک یو اے ای کے صدر کا پاکستان آمد پر پر شاندار تاریخی استقبال کیا جائے گا۔
پاکستانی دفترِ خارجہ کے مطابق یو اے ای کے صدر کا دورہ پاکستان دونوں ممالک کے درمیان طویل المدتی برادرانہ ودیرینہ تعلقات کی عکاسی کرتا ہے، متحدہ عرب امارات کے صدرکے ہمراہ وزرا اور سینئرحکام پرمشتمل اعلی سطح کا وفد بھی ہمراہ ہوگا۔دفتر خارجہ کے مطابق اس دورہ کیدوران دوطرفہ تعلقات، خطے اور عالمی سطح کے باہمی دلچسپی کے امور پر تبادلہ خیال کریں گے، یہ دورہ تجارت، سرمایہ کاری، توانائی، ترقی اور علاقائی استحکام کو مزید تقویت بخشے گا۔
صدر متحدہ عرب امارات کے دورہ پاکستان پر پرتپاک استقبال کی تیاریاں مکمل کر لی گئی ہیں، متحدہ عرب امارات کے صدر شیخ محمد بن زاید النہیان کی آمد پر پاک فضائیہ کے لڑاکا طیارے فضائی سلامی دیں گے۔پاکستانی حدود میں داخل ہوتے ہی پاک فضائیہ کے لڑاکا طیارے یو اے ای صدر کے طیارے کو حصار میں لیں گے، اس سے قبل پاکستان کی اعلی سول و عسکری قیادت بھی دو طرفہ تعلقات اور مضبوط روابط کیلئے یو اے ای کا دورہ کر چکی ہے۔
واضح رہے کہ صدر متحدہ عرب امارات کے دورہ پاکستان کے تناظر میں اسلام آباد میں تعطیل کا اعلان کیا گیا ہے، اسلام آباد کی حدود میں واقع پاکستان سیکرٹریٹ اور تمام وفاقی ادارے بند رہیں گے۔سینیٹ سیکرٹریٹ اور قومی اسمبلی سیکرٹریٹ بھی آج بند رہیں گے، اسلام آباد ہائیکورٹ نے بھی آج چھٹی کا اعلان کردیا ہے، رجسٹرار اسلام آباد ہائیکورٹ کے نوٹیفکیشن کے مطابق اسلام آباد ہائیکورٹ اور اسلام آباد ڈسٹرکٹ کورٹس 26 دسمبر کو بند رہیں گی۔
وفاقی آئینی عدالت کے رجسٹرار نے بھی آج کی کازلسٹ منسوخ کرتے ہوئے عام تعطیل کا نوٹیفکیشن جاری کردیا۔کابینہ ڈویژن کی جانب سے جاری نوٹیفکیشن کے مطابق آج اسلام آباد کے اسپتال، بینک، ضروری سروسز کے دفاتر، میٹرو پولیٹن کارپوریشن، سی ڈی اے دفاتر، اسلام آباد انتظامیہ، پولیس، آئیسکو اور سوئی ناردرن گیس کے دفاتر کھلے رہیں گے۔
