مہنگائی کے بعد شرح سود بھی سنگل ڈیجٹ پر لائیں گے، امیر مقام

وفاقی وزیر امور کشمیر، گلگت بلتستان و سیفران انجینئرامیر مقام نے کہا ہے کہ مہنگائی کے بعد شرح سود بھی سنگل ڈیجٹ پر لائیں گے۔شہر قائد میں مسلم لیگ ن ہائوس میں کارکنوں سے خطاب کرتے ہوئے امیر جماعت اسلامی کا کہنا تھا کہ ہرآدمی مہنگائی سے پریشان تھا، شہبازشریف نے دن رات محنت کی ہے، 40 فیصد مہنگائی کم ہوکر 2 سے 3 فیصد تک آ گئی ہے، یہ ایک بڑا معجزہ ہے۔انہوں نے کہا کہ شرح سود کو کم کرکے 12 فیصد لے آئے ہیں، اس کو سنگل ڈیجٹ پر لیکر آئیں گے جبکہ ایکسپورٹ میں اضافہ کیا گیا ہے۔وفاقی وزیر کا کہنا تھا کہ لوگ خط لکھ لکھ کر تھک گئے ہیں کہ آئی ایم ایف قرض نہ دے، اوورسیز بھی اب ایک شخص کے ساتھ نہیں ہے، ایک شخص صرف اپنی ذات کے لیے لڑتا رہا ہے۔انجینئرامیرمقام نے کہا کہ اس سال سے بیرون ملک سے ریمیٹنس میں 25 فیصد اضافہ ہوا ہے، زرمبادلہ میں روزانہ کی بنیاد پر بہتری آ رہی ہے، پی آئی اے کو یورپ میں بلیک لسٹ کیا گیا تھا، سابق حکمرانوں کو تو پاکستان کی فکر نہیں تھی۔ان کا مزید کہنا تھا کہ آج یورپ کے لیے فلائٹ آپریشن بحال ہوگیا ہے، اب نئے خطوط کا سلسلہ شروع ہوا ہے، انہیں یہ ہے کہ پاکستان رہے نہ رہے صرف ایک بندہ رہنا چاہیے۔