نعیم پنجوتھہ نے بانی پی ٹی آئی سے علیمہ خان کے رویے کی شکایت لگادی

اڈیالہ جیل میں بانی پی ٹی آئی سے ان کے وکلا کی ملاقات ہوئی، اس دوران نعیم حیدر پنجوتھہ نے علیمہ خان کے سخت رویے کی بانی پی ٹی آئی کو شکایت لگادی۔ ذرائع کے مطابق بانی پی ٹی آئی نے تسلی سے نعیم حیدر پنجوتھہ کی شکایت کو سنا، بانی پی ٹی آئی نے علیمہ خان کی سخت زبان کا نوٹس بھی لے لیا۔ذرائع کا کہنا ہے کہ بانی پی ٹی آئی نے علیمہ خان کی وکلا سے تکرار پر ناراضی کا اظہار کیا۔ذرائع کے مطابق بانی پی ٹی آئی نے یقین دلایا کہ وہ علیمہ خان کو وکلا سے الجھنے پر منع کریں گے۔واضح رہے کہ اس سے قبل بانی پی ٹی آئی کی بہن علیمہ خان کی اڈیالہ جیل کے داخلی دروازے پر پی ٹی آئی وکلا سے تلخ کلامی ہوئی تھی۔علیمہ خان نے کہا تھا کہ بانی پی ٹی آئی سے صرف وہی ملے گا جس کو کوئی ذمہ داری سونپی گئی ہو۔ بغیر ذمہ داری کے کوئی وکیل جیل کے اندر نہیں جائے گا۔