کراچی میں آج موسم خنک، جمعے سے درجہ حرارت بڑھنے کا امکان

کراچی میں جاتی سردی کو بریک لگ گیا، ٹھنڈی ہواں کی دوبارہ انٹری سے موسم سرد ہو گیا، مختلف علاقوں میں گزشتہ رات کا درجہ حرارت معمول سے کم ریکارڈ ہوا، شہر قائد میں موسم آج خنک رہے گا جبکہ جمعے سے درجہ حرارت بڑھنے کا امکان ہے۔محکمہ موسمیات کے مطابق شہر میں گزشتہ شب سے شمال مشرق کی سمت سے خشک ہوائیں ہلکی رفتار سے چل رہی ہیں، جس کے باعث موسم میں خنکی بڑھی ہے۔کراچی میں گزشتہ رات کو پارہ 13.1 ڈگری سینٹی گریڈ ریکارڈ ہوا، جو مارچ کے معمول کے درجہ حرارت سے 6.3 ڈگری سینٹی کم ہے، مارچ کا معمول کا اوسط درجہ حرارت 19.4 ڈگری سینٹی گریڈ ہے۔ماڑی پور اور اطراف میں درجہ حرارت دیگر علاقوں سے کم رہا اور پارہ 10 ڈگری سینٹی گریڈ ریکارڈ کیا گیا جبکہ جناح ٹرمینل میں درجہ حرارت 11.5، بن قاسم میں 13.6، گلستانِ جوہر میں 13.2 اور شارعِ فیصل پر 12.5 ڈگری سینٹی گریڈ ریکارڈ کیا گیا۔ماہرینِ موسمیات کا کہنا ہے کہ شہر کا موسم آج انتہائی خشک اور خنک رہ سکتا ہے جبکہ ہوا میں نمی کا تناسب 13 فیصد ہے، شام میں سمندری ہوائیں آہستہ آہستہ بحال ہونے لگیں گی، آج زیادہ سے زیادہ درجہ حرارت 30 سے 31 ڈگری سینٹی گریڈ تک رہنے کا امکان ہے اور آئندہ 24 گھنٹوں کے دوران موسم خشک رہے گا۔محکمہ موسمیات نے کل کم سے کم درجہ حرارت 16 سے 18 ڈگری سینٹی گریڈ تک رہنیکی پیش گوئی کی ہے، جمعے سے درجہ حرارت میں اضافہ ہونے لگے گا، آئندہ ہفتے موسم گرم اور پارہ 37 ڈگری سینٹی گریڈ تک رہنے کا امکان بھی ظاہر کیا ہے۔اندرون سندھ میں بھی درجہ حرارت معمول سے کم ریکارڈ ہوا، کئی مقامات پر درجہ حرارت سنگل ڈیجٹ پر جا پہنچا، موہن جوداڑو میں پارہ 3 ڈگری سینٹی گریڈ ریکارڈ کیا گیا۔موہن جو داڑو کا درجہ حرارت مارچ کے معمول کیاوسط سے11.1ڈگری سینٹی گریڈکم ہے۔مٹھی میں 3.5، میرپور خاص میں 7، جیکب آباد میں 8، شہید بینظیر آباد، سکرنڈ، سکھر اور پڈعیدن میں درجہ حرارت 7.5 ڈگری سینٹی گریڈ ریکارڈ ہوا۔