2 دن کیلئے پولیس کو میرے ماتحت کریں، جرم ہوا تو استعفیٰ دے دونگا: گورنر سندھ

گورنر سندھ کامران ٹیسوری کا کہنا ہے کہ صرف دو دن کے لیے آئی جی اور کراچی پولیس چیف کو میرے ماتحت کریں پھر شہر میں جرم ہوا تو میں عہدے سے استعفیٰ دے دوں گا۔سوال اسپتال کراچی کے دورے کے موقع پر میڈیا سے گفتگو کرتے ہوئے گورنر سندھ کامران ٹیسوری کا کہنا تھا سول اسپتال میں ایک بستر پر تین تین بچے رکھے گئے ہیں، زیر علاج بچوں کے اہلخانہ فٹ پاتھ پر سونے پر مجبور نظر آئے۔ان کا کہنا تھا الیکشن قریب ہیں اور سب جماعتیں دعوےکر رہی ہیں، کراچی کے تمام سرکاری اسپتالوں کا بہت برا حال ہے، دیگر صوبوں میں 10 لاکھ روپے تک علاج کے لیےکارڈز موجود ہیں، سیکرٹری صحت سے کہا کہ سندھ کے عوام کو بھی صحت کارڈ مہیا کرنے کے اقدامات کیے جائیں، 95 ارب روپےکا بجٹ اسپتالوں کو دیا جا رہا ہے وہ کہاں جا رہا ہے۔