امریکہ کاایران کے تین اہم جوہری مقامات پر حملہ

چند دنوں کے غور و خوض کے بعد اور اپنی خود ساختہ دو ہفتوں کی ڈیڈ لائن سے بہت پہلے،ٹرمپ کا اپنے بڑے حریف ایران کے خلاف اسرائیل کی فوجی مہم میں شامل ہونے کا فیصلہ تنازعے میں ایک بڑا اضافہ ہے،اب مشرق وسطیٰ میں عدم استحکام کے ایک نئے دور کا آغاز ہونے کا خدشہ بھی بڑھ گیا ہے۔حملے کے بعدامریکی صدر ڈونلڈ ٹرمپ نے کہا کہ ایران کو اب امن قائم کرنا ہوگا اور اگر انہوں نے ایسا نہیں کیا تو آئندہ حملے کہیں زیادہ بڑے ہوں گے، اب یا تو امن آئے گا، یا ایران کے لیے ایسا سانحہ ہوگاجو پچھلے 8 دنوں میں ہم نے نہیں دیکھا۔ ٹرمپ نے ایران پر امریکی حملوں کے بعد قوم سے 3 منٹ کا مختصر خطاب کیا، جس میں انہوں نے ایران کے خلاف کارروائی کو تاریخی قرار دیا۔ انہوں نے دعویٰ کیا کہ امریکی فوج نے ایرانی حکومت کی 3 اہم جوہری تنصیبات فردو، نطنز اور اصفہان پر بڑے پیمانے پر اور انتہائی درست حملے کیے، دنیا ان ناموں کو برسوں سے سنتی آ رہی ہے کیونکہ ایران نے ان کے ذریعے ایک نہایت خطرناک منصوبہ تیار کیا۔ہمارا مقصد ایران کی جوہری افزودگی کی صلاحیت کو مکمل طور پر تباہ کرنا اور اس ریاست کے ہاتھوں دنیا کو درپیش جوہری خطرے کا خاتمہ تھا، جو دہشت گردی کی سب سے بڑی سرپرست ہے۔انہوں نے کہاکہ آج رات، میں دنیا کو یہ کہہ سکتا ہوں کہ یہ حملے ایک شاندار فوجی کامیابی تھے، ایران کی جوہری افزودگی کی کلیدی تنصیبات مکمل طور پر تباہ کر دی گئی ہیں، مشرقِ وسطی کا غنڈہ اب امن قائم کرے، اسے کرنا ہوگا۔ انہوں نے ایران کو دھمکی دی کہ اگر اس نے ایسا نہ کیا تو اگلے حملے کہیں زیادہ شدید اور کہیں زیادہ آسان ہوں گے۔اس حملے بعد اب یہ بات واضح ہو گئی ہے کہ امریکہ اس جنگ میں براہ راست شامل ہو گیا ہے،اور یہ بات بھی واضح ہو گئی ہے کہ یہ جنگ اسرائیل نے امریکہ کی تھپکی پر ہی شروع کی تھی۔اس وحشیانہ حرکت پر دنیا کے سنجیدہ حلقے مضطرب ہیں کہ ڈونلڈ ٹرمپ نے جنوری میں خود کو امن قائم کرنے والا کہتے ہوئے وائٹ ہاؤس میں دوبارہ قدم رکھا تھا،اور دنیا کو امید بھی تھی کہ وہ ایسا کر گزریںگے لیکن ایران اور اسرائیل کے درمیان جاری تنازعے میں یوٹرن لیتے ہوئے امریکہ کو شامل کر کے انھوں نے انتہائی برعکس قدم اٹھایا ہے۔ مشرقِ وسطیٰ میں امن لانے کی بجائے ٹرمپ نے خطے کو جنگ کے جھونک دیا ہے۔سوشل میڈیا پر امریکی افواج کی جانب سے ایران کے تین جوہری مقامات کو نشانہ بنانے کے اعلان کے صرف دو گھنٹے بعد ٹرمپ نے وائٹ ہاؤس سے قوم سے خطاب میں اس کارروائی کو شاندار کامیابی قرار دیا جبکہ دنیا اسے شکست خوردگی سے تعبیر کررہی ہے۔ نائب صدر جے ڈی وینس، وزیر خارجہ مارکو روبیو اور وزیر دفاع پیٹ ہیگسیتھ کے ساتھ کھڑے ہو کر ٹرمپ نے ایران کو خبردار کیا کہ اگر اس نے اپنا جوہری پروگرام ترک نہ کیا تو آئندہ حملے زیادہ تباہ کن اور کہیں زیادہ آسان ہوں گے۔ صدرٹرمپ کیاپنے تئیں اعتماد بھرے بیانات کے باوجود ایران میں امریکی فوجی مداخلت خطے اور دنیا کیلئے بدترین منظرنامے میں تبدیل ہو سکتا ہے۔اقوام متحدہ کے سیکریٹری جنرل انتونیو گوتریس نے خبردار کیا ہے کہ امریکی اقدام کے نتیجے میں افراتفری کا سلسلہ شروع ہو سکتا ہے اور یہ کہ مشرقِ وسطی پہلے ہی کشیدگی کی حالت میں ہے۔
بھارتی ہٹ دھرمی ،تباہی کا یقینی پیش خیمہ
بھارت کا پاکستان کے ساتھ سکور برابر رکھنے کا جنون حد سے گزر رہا ہے۔ایسا لگتا ہے کہ یہ بین الاقوامی وعدوں کے ساتھ ساتھ سفارت کاری اور ہمسائیگی کے اصولوں سے بالکل بے خبر ہے۔بھارتی وزیر داخلہ امیت شاہ کی اسلام آباد کے ساتھ سندھ طاس معاہدہ کو بحال نہ کرنے اور پاکستان کی طرف بہنے والے پانی کو دیگر ہندوستانی ریاستوں کی طرف موڑنا جاری رکھنے کی دھمکی حماقت کے سوا کچھ نہیں۔اس طرح کسی معاہدے کی معطلی عالمی بینک کے نام اور نچلے دریا کی ریاست کیلئے عالمی کنونشن کے تحت ممکن نہیں ہے۔دہلی انڈس واٹر سسٹم کے تین مغربی دریاؤں سے اضافی بہاؤ کو زبردستی ہٹا کر اور اس کے راستے پر 113 کلومیٹر لمبی نہر کی تعمیر پر غور کر کے فطرت پر اثر انداز ہونے کی بھی کوشش کر رہا ہے۔ پاکستان پہلے ہی پانی کی کمی کے بحران کا شکار ہے ۔ حالیہ چار روزہ جنگ کے پس منظر میں اسلام آباد کی طرف سے اس پر بات کرنے کا مطالبہ بہروں کے کانوں پر پڑا ہے۔اس پر عمر عبداللہ، مقبوضہ جموں و کشمیر کے وزیر اعلیٰ نے اپنی ریاست سے پانی روکنے کی ناقص حکمت عملی پر اپنا غصہ نکالا ہے ۔جہاں تک پاکستان کا تعلق ہے،وہ بھارت کے ساتھ بات چیت کا خواہاں ہے تاکہ دوطرفہ تعلقات میں موجود تمام اضطراب پر بات چیت کی جاسکے۔یہی وجہ ہے کہ اس نے امریکی صدر ڈونلڈ ٹرمپ کی ثالثی کو قبول کیا۔ہندوستان کے لیے آگے کا واحد راستہ یہ ہے کہ وہ صورتحال کو مزید بگاڑنے سے باز آجائے اور پانی کے معاملے میں منطق کا سہارا لے۔اس کے شمال میں گلیشیئرز سے پانی کو طویل عرصے تک روکے رکھنے کا ناقص تصور تباہی کا یقینی پیش خیمہ ہے۔
پولیو کے خاتمے کی کوششیں بارآور کیوں نہیں
2025 میں پاکستان میں پولیو کے 12ویں کیس کی تصدیق بنوں سے تعلق رکھنے والے ایک لڑکے نے صحت عامہ کے بگڑتے ہوئے بحران میں ایک اور سنگین سنگ میل کی نشاندہی کی۔اس سال کے کیسز،جو کے پی کے چھ اضلاع،سندھ کے چار اور پنجاب اور گلگت بلتستان میں ایک ایک اضلاع میں پھیلے ہوئے ہیں،ایک خطرناک رجحان کو ظاہر کرتے ہیں۔کئی دہائیوں کی کوششوں کے باوجود،یہ وائرس بڑے شہروں میں دوبارہ قدم جما رہا ہے۔جبکہ ہم اب بھی اعدادوشمار کے لحاظ سے پچھلے سال کے مقابلے میں بہتر کارکردگی کا مظاہرہ کر رہے ہیں،اس کی واحد وجہ یہ ہے کہ 2024 میں 74 کیسز 2023کے مقابلے میں 12 گنا اضافے کی نمائندگی کرتے ہیں۔کئی باہم منسلک بحران اس دھچکے کو جنم دیتے ہیں،بشمول آپریشنل فرق،غلط معلومات،عسکریت پسندی اور سیکورٹی،اور سرحد سے متعلقہ مسائل،کے پی اور بلوچستان کے کئی ناقابل رسائی علاقوں میں حفاظتی چیلنجوں،عملے کی کمی اور رسد کی دشواریوں کی وجہ سے کئی مہینوں اور یہاں تک کہ سالوں سے ویکسینیشن کی جامع کوششیں نہیں دیکھی گئیں۔ ویکسین مخالف پروپیگنڈہ اور انتہا پسند گروہوں کی طرف سے دھمکیاں اس معاملے کو مزید پیچیدہ بناتی ہیں۔آخر کار،افغان سرحد پہلے ہی صحت کے حکام کیلئے تشویش کا باعث بنی ہوئی تھی کیونکہ سرحد کے اس پار اور پناہ گزینوں کے درمیان ویکسینیشن کی کم شرح،اور سیکیورٹی خطرات تھے۔اگر تہران کیخلاف اسرائیل کی شیطانی مہم بڑی تعداد میں ایرانیوں کو پاکستان کی طرف بھاگنے کا باعث بنتی ہے تو یہ صورتحال مزید خراب ہو سکتی ہے۔ چیلنجز کی ابھرتی ہوئی نوعیت کا مطلب ہے کہ ملک کے کسی بھی حصے کے لیے کوئی واحد حل نہیں ہے۔اگرچہ ویکسینیشن کی جاری کوششیں قابل ستائش ہیں،لیکن کوریج کے طویل خلا کو پر کرنے کیلئے تخلیقی حل درکار ہیں،خاص طور پر زیادہ خطرے والے علاقوں میں جہاں گھر گھر مہمات کو سائٹ سے سائٹ کی کوششوں سے تبدیل کیا گیا تھا جو کہ محفوظ ہونے کے باوجود بہت کم موثر ثابت ہوئی ہیں۔ہمیں والدین اور حکومت کے درمیان اعتماد کی کمی کو بھی پورا کرنا چاہیے۔سیاسی رہنماں،صحت کے اداروں اور مقامی اثر و رسوخ کے حامل افراد کو خرافات کو دور کرنے،ویکسینیٹروں کی حفاظت کو یقینی بنانے اور ہر خوراک ہر بچے تک پہنچنے کی ضمانت دینے کیلئے متحد ہونا چاہیے۔پولیو کا خاتمہ اب بھی چند سالوں میں ممکن ہے،لیکن صرف اس صورت میں جب ہم بے مثال عجلت اور ہم آہنگی کے ساتھ کام کریں۔