افہام و تفہیم اور سیاسی تدبر کا مظاہرہ وقت کا تقاضا

حکمراں اتحادی جماعتیں عمران خان سے مذاکرات پر تقسیم کا شکارہو گئی ہیں۔سیاسی بے یقینی کومعمول پر لانے کے لئے سیاسی حلقوںنے اپنی کوششیں تیز توکردی ہیں،لیکن دوسری طرف حکومت کے لئے نئی مشکل آن کھڑی ہوئی ہے کہ اس کی اتحادی جماعتیں اس بات پر متفق نہیں ہیں۔بات چیت کے سلسلے میں جماعت اسلامی، پیپلزپارٹی اور عوامی نیشنل پارٹی پیش پیش ہیں جبکہ مسلم لیگ ن اور جے یو آئی کارویہ بات چیت کے ذریعے معاملات طے پانے کے معاملے میں مشروط اور غیر واضح ہے۔ اس ضمن میں گزشتہ روز حکومتی اتحادیوں کے اجلاس میں بلاول بھٹو زرداری نے اپوزیشن سے مذاکرات کے معاملے پر اصرار کیا ، متحدہ قومی موومنٹ ، بلوچستان نیشنل پارٹی اور خالد مگسی کی جانب سے بلاول بھٹو کے مذاکرات کے موقف کی تائید کی گئی۔علاوہ ازیںچوہدری سالک اور محسن داوڑ نے بھی بلاول بھٹو کے موقف کی تائید کی تاہم حکومتی اتحادیوں کے اجلاس میں جے یو آئی نے مذاکرات سے متعلق بلاول بھٹو کے موقف کی مخالفت کر دی ۔جے یو آئی نے موقف اپنایا کہ عمران خان کوئی سیاسی قوت نہیں ہے کہ اس سے ڈائیلاگ کیا جائے تاہم بلاول بھٹو نے کہا کہ بات چیت کے دروازے بند کردینا غیرجمہوری اور غیرسیاسی بھی ہے، یہ وقت کی ضرورت ہے کہ ڈائیلاگ کا راستہ اختیار کرکے ملک کو بحران سے نکالا جائے۔یہ اجلاس اپوزیشن سے مذاکرات کے معاملے پر اختلاف کے بعد حکومتی اتحادیوں کا اجلاس کسی اتفاق رائے کے بغیر ختم ہوگیا۔ پی ٹی آئی کے ساتھ مذاکرات کے معاملے پر اتفاق رائے کے لیے وزیراعظم کے طلب کردہ حکمران اتحادی جماعتوں کے اجلاس نے بظاہر یہ اتحاد دو حصوں میں تقسیم کر دیا ہے۔ اس ضمن میں وزیر اطلاعات مریم اورنگزیب مطابق پی ٹی آئی کے ساتھ بات چیت شروع کرنے کے آپشن پر پارٹی کے اندر مشاورت جاری ہے۔انہوں نے میڈیا رپورٹس کی بھی تردید کی کہ اتحاد کے اندر اختلاف رائے ہے اور کہا کہ تمام فیصلے اتفاق رائے کے بعد کیے جائیں گے، پارٹیوں کی رائے مختلف ہو سکتی ہے لیکن ہمارے فیصلے اتفاق رائے سے ہوتے ہیں۔ ایم کیو ایم پاکستان کا کہنا ہے کہ اپوزیشن جماعت پی ٹی آئی کے ساتھ بات چیت شروع کرنے کا معاملہ بہت نازک ہے اور اس کا فیصلہ تمام اتحادی جماعتوں کے سربراہوں کو کرنا چاہیے، کیونکہ اتحادی جماعتوں کے اس اجلاس میں ایم کیو ایم پی کے کنوینر خالد مقبول صدیقی، جے یو آئی کے فضل الرحمن اور مسلم لیگ(ق)کے سربراہ چوہدری شجاعت موجود نہیں تھے۔ ان کا کہنا تھا کہ اصولی طور پر ہم ہر اسٹیک ہولڈر کے ساتھ بات چیت کی حمایت کرتے ہیں لیکن اس کا یہ مطلب نہیں کہ ہم نے آج کی میٹنگ میں پیپلز پارٹی کے موقف کی حمایت کی۔ اجلاس کے دوران انتخابات کے لیے فنڈز کا معاملہ بھی سامنے آیا شرکا نے نشاندہی کی کہ جب حکومت مالی بحران کی وجہ سے فنڈز جاری کرنے سے انکار کر رہی ہے تو وہ اس حقیقت کے بعد رقم مختص کرنے کا جواز کیسے دے سکتی ہے۔ اتحاد نے عدالت عظمیٰ کے حکم کے مطابق پنجاب میں انتخابات کے انعقاد کے لیے درکار 21 ارب روپے کے فنڈز مختص نہ کرنے سے متعلق پارلیمنٹ کے فیصلے کو برقرار رکھنے کا بھی عزم کیا۔ تاہم اجلاس کو یہ بتایا گیا کہ بیوروکریسی حکومت کی اطاعت کرنے یا توہین عدالت کا سامنا کرنے کے بارے میں مخمصے کا شکار ہے۔بیوروکریسی کےلئے یہ ایک سنگین صورتحال ہے،عدالتی فیصلے کی راہ میں لیت ولعل سے جس طرح کام لیا جا رہا ہے،اس کا سارا ملبہ اس پر گرایا جا سکتا ہے،جس کا بیورو کریسی کو بھاری نقصان اُٹھانا پڑ سکتا ہے۔دوسری طرف اجلاس کے دوران حکمران جماعتوں نے زور دے کر کہا کہ وہ تمام تر مشکلات کے باوجود اکتوبر میں ختم ہونے والی اپنی مدت پوری کریں گی۔ اجلاس میں اپنے اتحادیوں سے خطاب کرتے ہوئے وزیراعظم شہباز شریف نے کہا کہ جمہوریت میں فیصلے مشاورت سے کیے جاتے ہیں، مسلط نہیں کیے جاتے۔دوسری جانب دیکھا جائے تو الیکشن کمیشن کو 21ارب روپے کی فراہمی کی ڈیڈ لائن پیر کو ختم ہوگئی ہے،موجودہ نگران سیٹ اپ کا مستقبل بھی سوالیہ نشان بن گیا ہے، اس لئے اس حوالے سے نئی صورتحال پیدا ہوئی ہے جس پر مختلف سطحوں پر غور جاری ہے۔ تحریک انصاف سپریم کورٹ پر زور دے رہی ہے کہ وزیراعظم اور کابینہ کو حکم عدولی پر نااہل قرار دیا جائے ۔ عدالت عظمیٰ نے اس سلسلے میں کوئی نیا حکم فی الحال جاری نہیں کیا لیکن منطقی طور پر یہ معاملہ اس کے زیر غور ہے۔ آنے والے دنوں میں یہ آئینی رسہ کشی جاری رہتی ہے تو یقینا اس سے مسائل بڑھیں گے جس کا موجودہ معاشی سیاسی اور آئینی بحرانوں کے مشکل دور میں ملک متحمل نہیں ہوسکتا۔
گوادرفری زونز ”ایکسپورٹ انڈسٹریل پارکس” بننے کی طرف گامزن
سی پیک خطے کی ترقی کاضامن ہے اورپاکستان کی معیشت میں اس کی حیثیت ریڑھ کی ہڈی کی طرح ہے۔گوادر بندرگاہ کی طویل عرصے سے علاقائی روابط کے ایسے مرکز کے طور پر تشہیر کی جاتی رہی ہے جو جنوبی ایشیا کی جغرافیائی سیاست میں متحرک کردار ادا کرے گا۔ پاک چین اقتصادی راہداری کے اہم ترین منصوبے کا مقصد پاکستان، افغانستان، وسطی ایشیا اور چین کو ایک بحری تجارتی گڑھ کی صورت میں گوادر کے ذریعے ملانا ہے۔ چائنہ اوورسیز پورٹس ہولڈنگ کمپنی پاکستان پرائیوٹ لمیٹڈ سالہ لیز کے منصوبے کے تحت اس کا انتظام دیکھتی ہے۔گوادر سے شروع ہونے والے تجارتی راستوں کا مقصد خطے بھر میں رابطوں کے اہم ذرائع میں توسیع ہے۔ گوادر کی تذویراتی حیثیت کے سبب پاکستان اس حیثیت میں ہے کہ وہ موقع سے فائدہ اٹھاتے ہوئے علاقائی رابطے کا مرکز بنے اور متعدد تذویراتی شراکت داروں کے ہمراہ رابطے قائم کرے۔ البتہ گوادر بندرگاہ اور اس کی صلاحیتوں کو بڑھانے کےلئے منصوبے کی تذویراتی، سیاسی، معاشی اور سماجی و ثقافتی جہتوں کی اندرونی پڑتال نیز یہ سوال پوچھنے کی ضرورت ہے کہ علاقائی و غیر علاقائی رابطہ اہداف کے ان عناصر پر کیا اثرات مرتب ہوں گے۔ چین پاکستان اقتصادی راہداری کی 10 سالہ ترقی کی داستان کے کثیر جہتی مفاد کے ساتھ، گوادر فری زونز ”ایکسپورٹ انڈسٹریل پارکس” بننے کی طرف گامزن ہیں، چائنا اوورسیز پورٹ ہولڈنگ کمپنی کے نئے چیئرمین یو بو نے اپنے پہلے خطاب گوادر پورٹ اور گوادر فری زونز پاکستان اور اس سے باہر کے سرمایہ کاروں کےلئے سرمایہ کاری کے بے پناہ مواقع فراہم کرتے ہیں۔گوادر پورٹ اور فری زونز کا انتظام کرنےوالے پالیسی فریم ورک اور رہنما اصولوں کو ٹرانس شپمنٹ کےلئے اس کی جیو اکنامک اہمیت کو مدنظر رکھتے ہوئے وضع اور نافذ کیا گیا ہے۔ جیسا کہ گوادر فری زونز کو ہر قسم کے صوبائی ٹیکسوں، وفاقی ٹیکسوں اور کسٹم ڈیوٹی سے مستثنیٰ قرار دیا گیا ہے، اس لیے سرمایہ کار خاص طور پر وہ لوگ جو مینوفیکچرنگ کاروبار کرنے کا ارادہ رکھتے ہیں، اس طرح کی مراعات حاصل کرنے کےلئے اچھی پوزیشن میں ہونگے۔ زون میں اضافی اخراجات کے بغیر، پیداواری لاگت ٹیرف ایریا سے بہت کم ہو جاتی ہے۔ اس کے بعد مصنوعات بین الاقوامی مارکیٹ میں سستی اور مسابقتی ہوں گی۔ ممکنہ سرمایہ کاروں کو ان تجارتی ترغیبات سے فائدہ اٹھانا چاہیے۔ اس کے علاوہ، یہ کاروباری حوصلہ افزائی پاکستانی تاجروں کو برآمدات کو بڑھانے اور زرمبادلہ کے ذخائر کو مضبوط کرنے کےلئے ایک ناگزیر زور فراہم کرتی ہے۔ اب یہ مکمل طور پر فعال ہے،یہ بلک کارگو، کنٹینرائزڈ اور ایل پی جی جہازوں کو ہینڈل کرنے کی پوری صلاحیت سے لیس ہے۔ تین کثیر المقاصد برتھ سینکڑوں میٹرک ٹن یوریا، گندم اور ڈی اے پی کھاد کو پروسیس کر سکتے ہیں۔ اب پہلی رکاوٹ سیکیورٹی کی بے یقینی ہے۔ اگرچہ پچھلے کئی مہینوں میں اس میں بہتری آئی ہے لیکن پھر بھی سیکورٹی کے خلا کو پر کرنے کےلئے ایک بڑی گنجائش موجود ہے، دوسرا پریشان کن مسئلہ ڈیزل جنریٹر سے پیدا ہونے والی بجلی کی زیادہ قیمت ہے۔ اگر انہیں گرڈ سے متعلق بجلی مل جائے تو ترقی کی ر فتار تیز ہو جائیگی ۔ فری زونز کا آپریٹر گوادر فری زون کمپنی اپنے سرمایہ کاروں کو پانی اور بجلی سمیت تمام افادیت کی سہولیات فراہم کرنے کو یقینی بناتی ہے۔ اس طرح، سی او پی ایچ سی بہت سے بجلی اور پانی کے منصوبوں پر کام کر رہا ہے۔ سی او پی ایچ سی نے فری زون اور بندرگاہ کے علاقوں میں بالترتیب 0.2 ملین اور 0.1 ملین گیلن یومیہ کی پیداواری صلاحیت کے ساتھ دو صاف کرنے کے پلانٹ قائم کیے ہیں تاکہ استعمال کے لیے بلاتعطل پانی فراہم کیا جا سکے۔ پانی کے مسائل سے نمٹنے کے سلسلے میں، چینی فنڈ سے 1.2 ایم جی ڈی ڈی سیلینیشن واٹر پلانٹ تکمیل کے آخری مرحلے میں ہے۔