- الإعلانات -

پاکستان نے انڈر 19 ورلڈ کپ میں پانچویں پوزیشن حاصل کر لی

ڈھاکہ :  پاکستان نے انگلینڈ کو با آسانی 7 وکٹوں سے شکست دے کر آئی سی سی انڈر 19 ورلڈ کپ میں پانچویں پوزیشن حاصل کر لی۔ گرین شرٹس نے 265 رنز کا ہدف 44 ویں اوور میں 3 وکٹوں کے نقصان پر حاصل کیا۔ ذیشان ملک نے 93 اور سیف بدر نے ناقابل شکست 75 رنز بناکر ٹیم کی جیت میں اہم کردار ادا کیا۔ ذیشان ملک مرد میدان قرار پائے۔ گزشتہ روز فتح اللہ میں کھیلے گئے پانچویں پوزیشن کے میچ میں انگلینڈ انڈر 19 نے پہلے بیٹنگ کرتے ہوئے مقررہ 50 اوورز میں 7 وکٹوں کے نقصان پر 264 رنز بنائے، سام کوران نے عمدہ بیٹنگ کا مظاہرہ کیا اور 83 رنز بنائے۔ ثمین گل اور سیف علی نے دو، دو جبکہ حسن محسن، حسن خان اور شاداب خان نے ایک ایک وکٹ حاصل کی۔ جواب میں پاکستان انڈر 19 نے ہدف 43.1 اوورز میں 3 وکٹوں کے نقصان پر حاصل کر لیا۔ ذیشان ملک نے 15 چوکوں کی مدد سے 93 رنز کی عمدہ اننگز کھیلی، سیف بدر نے ناقابل شکست 75 اور حسن محسن نے 39 رنز بنائے۔ جارج گارٹن، میسن کرین اور سام کوران نے ایک ایک وکٹ حاصل کی۔ ذیشان ملک کو مین آف دی میچ کا ایوارڈ دیا گیا۔