ڈالر کی قدر میں کمی کا سلسلہ جاری ، وزیر خزانہ بڑے مشن پر امریکہ روانہ

انٹر نیشنل مانیٹری فنڈ (آئی ایم ایف ) اور عالمی بینک سے قرض پروگرام کے حوالے سے مذاکرات کیلئے وزیر خزانہ اسحاق ڈار امریکہ روانہ ہو گئے ہیں۔
تفصیلات کے مطابق اسحاق ڈار آئی ایم ایف کے نمائندوں سے قرض پروگرام پر مذاکرات کریں گے جبکہ عالمی بینک کے عہدیداران سے بھی فنڈز سمیت دیگر امور پر بات چیت ہو گی۔
رپورٹ کے مطابق پاکستان رواں مالی سال 23-2022کے لیے میکرو اکنامک فریم ورک پر نظرثانی کے لیے باضابطہ درخواست کرے گا، بڑھتی مہنگائی، جی ڈی پی کی شرح نمو میں کمی، بجٹ خسارے اور کرنٹ اکاؤنٹ خسارے کے اہداف میں نرمی کی درخواست کی جائے گی،
اعلیٰ پاکستانی عہدیدار کے مطابق آئی ایم ایف حکام سے مذاکرات کے دوران توسیعی فنڈ سہولت سے منسلک شرائط نرم کرنے کی درخواست بھی کی جائے گی جس میں اگلے چند ماہ کیلئے پیٹرولیم لیوی اور بجلی کی فیول پرائس ایڈجسٹمنٹ منجمد کرنا بھی شامل ہے۔
میکرو اکنامک فریم ورک پر نظر ثانی کی درخواست رواں مالی سال شدید سیلاب کے پیش نظر کی جائے گی جس نے پاکستان میں تباہی مچا دی ہے اور مشکلات سے دوچار معیشت کیلئے 30 ارب ڈالرز سے زائد کی تعمیراتی لاگت درکار ہے۔