سپریم کورٹ آف پاکستان کی جوڈیشل ریسٹ ہاؤس کوئٹہ میں اعظم سواتی کے قیام کی تردید کر دی

سپریم کورٹ آف پاکستان نے جوڈیشل ریسٹ ہاؤس کوئٹہ میں اعظم سواتی کے قیام کی تردید کر دی۔
تفصیلات کے مطابق سپریم کورٹ ججز ریسٹ ہاؤس کوئٹہ میں قیام کے معاملے پر عدالت عظمیٰ نے موقف دیتے ہوئے کہا ہے کہ سینیٹر اعظم سواتی کبھی بھی سپریم کورٹ ججز کے ریسٹ ہاؤس کوئٹہ میں نہیں ٹھہرے۔
سپریم کورٹ اعلامیے کے مطابق جوڈیشل ریسٹ ہاؤس کوئٹہ کا انتظام رجسٹرار آفس سپریم کورٹ کے پاس ہے، جوڈیشل ریسٹ ہاؤس میں صرف موجودہ اور ریٹائرڈججزقیام کرسکتے ہیں۔
عدالت عظمیٰ کی جانب سے جاری کئے گئے اعلامیہ میں کہا گیا ہے کہ سپریم کورٹ ججز ریسٹ ہاؤس کے انتظام کی نگرانی رجسٹرار سپریم کورٹ کے ذمہ ہیں، یہ آرام یا قیام گاہ صرف سپریم کورٹ کے ججز کیلئے ہی مختص ہے۔
سپریم کورٹ اعلامیہ میں بتایا گیا ہے کہ بلوچستان سپیشل برانچ کے مطابق اعظم سواتی نے بلوچستان جوڈیشل اکیڈمی میں قیام کیا، جو سپریم کورٹ کے زیر انتظام نہیں ہے۔
خیال رہے کہ گزشتہ روز پریس کانفرنس میں پی ٹی آئی کے رہنما و سینیٹر اعظم سواتی نے جوڈیشل لاجز کوئٹہ میں قابل اعتراض ویڈیو ریکارڈنگ کاالزام لگایا تھا۔