لاہور میں بڑے منصوبے کیلئے پنجاب حکومت اور ایشین ڈولپمنٹ بینک کے درمیان اتفاق

پنجاب حکومت اور ایشین ڈیویلپمنٹ بینک کے درمیان بلیولائن انڈر گراؤنڈ پراجیکٹ کیلئے اسولی اتفاق ہو گیا ۔
تفصیلات کے مطابق وزیراعلیٰ پنجاب چوہدری پرویز الٰہی اور سابق وفاقی وزیرمونس الٰہی سے وزیراعلیٰ آفس میں ایشین ڈیویلپمنٹ بینک کے کنٹری ڈائریکٹر یونگ یی کی قیادت میں وفد نے ملاقات کی جس میں پنجاب میں ایشین ڈیولپمنٹ بینک کے تعاون سے جاری مختلف منصوبوں پر پیشرفت اور لاہور میں بلیو لائن انڈر گراؤنڈ پراجیکٹ شروع کرنے کے حوالے سے تبادلہ خیال کیا گیا۔
ملاقات میں پنجاب حکومت اور ایشین ڈیولپمنٹ بینک کے درمیان بلیولائن انڈر گراؤنڈ پراجیکٹ کے حوالے سے تعاون پر اصولی اتفاق کیا گیا، ایشین ڈیولپمنٹ بینک کے کنٹری ڈائریکٹر نے بلیو لائن انڈر گراؤنڈ پراجیکٹ کیلئے تعاون کی یقین دہانی کرائی، ملاقات میں قصور سے بہاول نگر تک ستلج کوریڈور پراجیکٹ کے حوالے سے بھی گفتگو ہوئی۔
علاوہ ازیں پرویزالٰہی کی زیر صدارت ایل ڈی اے کی گورننگ باڈی کا اجلاس ہوا جس میں پرویزالٰہی نے ایل ڈی اے کو مساجد سے سیوریج چارجز وصول کرنے سے روک دیا، نئے اسکولوں کی تعمیر کیلئے قواعد و ضوابط میں ضروری رد و بدل کی منظوری دے دی، اجلاس میں فیصلہ کیا گیا کہ پرائیویٹ رہائشی اسکیموں سے نئی شرح سے سیوریج چارجز وصول کئے جائیں گے۔
دریں اثناء پرویز الٰہی نے ماہر تعلیم ڈاکٹر سمیرا رحمن کو ہائیر ایجوکیشن کمیشن پاکستان میں پنجاب کا نمائندہ مقرر کر دیا، پرویزالٰہی سے پروفیسر ڈاکٹر سمیرا رحمن نے ملاقات کی،وزیراعلیٰ نے سمیرا رحمن کو تقرری کا نوٹیفکیشن دیا۔