جوائنٹ عوامی ایکشن کمیٹی کے پرتشدد عناصر کا اسلام آباد پولیس کے اے ایس آئی پر تشدد

اسلام آباد پولیس کے اسسٹنٹ سب انسپکٹر (ASI) جاوید مسیح جوائنٹ عوامی ایکشن کمیٹی (JAAC) کےمظاہرین کے تشدد کے نتیجے میں شدید زخمی ہو گئے، جنہیں ٹانگ میں فریکچر کے باعث کمبائنڈ ملٹری ہسپتال (CMH) راولاکوٹ منتقل کر دیا گیا ہے۔ بتایا گیا ہے کہ اے ایس آئی جاوید مسیح اپنی والدہ کی علالت کے باعث سول کپڑوں میں گھر جا رہے تھے۔ انہوں نے ایک موٹر سائیکل کا انتظام کیا اور سٹی پولیس اسٹیشن میں ملازم مقامی رہائشی مہتاب صادق سے راولپنڈی کی طرف چھوڑنے کی درخواست کی۔ سفر کے دوران رائے چوک سے محض 150 میٹر آگے 15 سے 20 مظاہرین نے انہیں روک لیا اور .22 ایم ایم کیلیبر رائفل کے فولڈنگ بٹ سے بے دردی سے تشدد کا نشانہ بنایا، جس کے نتیجے میں اے ایس آئی جاوید مسیح کی بائیں ٹانگ ٹوٹ گئی۔
مظاہرین نے نہ صرف ان پر وحشیانہ تشدد کیا بلکہ انہیں زبردستی ایک ویڈیو بیان ریکارڈ کرنے پر بھی مجبور کیا، جس میں ان سے یہ کہلوایا گیا کہ ان کی ٹانگ موٹر سائیکل حادثے میں ٹوٹی ہے۔ اس کے علاوہ مظاہرین نے ان سے قانون نافذ کرنے والے اداروں کی نفری اور ان کے مقامات کے بارے میں بھی پوچھ گچھ کی۔ حکام کے مطابق زخمی اہلکار اس وقت سی ایم ایچ میں زیر علاج ہیں اور ان کی حالت خطرے سے باہر بتائی جاتی ہے، جبکہ واقعے کی مزید تحقیقات کا آغاز کر دیا گیا ہے۔