وزیرداخلہ کی اصلاحی مہم

وزیرِ داخلہ محسن نقوی تیزی سے ایک ایسے عملی اور متحرک رہنما کے طور پر سامنے آ رہے ہیں جو نتائج دینے کیلئے پُرعزم ہے۔قابلِ پیمائش بہتری،ادارہ جاتی اصلاحات اور کارکردگی پر مبنی کام کے طریقہ کار پر ان کا اصرار ایک ایسے طرزِ عمل کی عکاسی کرتا ہے جس کی حکومتی سطح پر شدید ضرورت ہے۔لہذا،وزارتِ داخلہ کے تمام ماتحت اداروں کے سربراہان کو دو سالہ جامع اصلاحاتی و تبدیلی کے منصوبے تیار کرنے کی ہدایت ایک خوش آئند اقدام ہے۔اس کا مقصد محض منصوبے اور دستاویزات تیار کرنا نہیں،بلکہ انہیں نمایاں اور عملی بہتری میں تبدیل کرنا ہونا چاہیے۔نقوی نے بجا طور پر اس بات پر زور دیا ہے کہ وزارت کے تحت ہر ادارے کو جدید خطوط پر استوار کیا جائے،ضروری وسائل سے لیس کیا جائے اور اسے زیادہ فعال اور عوام دوست بنایا جائے۔انہوں نے جہاں بھی ضرورت ہو، وہاں قانونی ترامیم اور اصلاحات کرنے کا بھی مطالبہ کیا ہے۔اس عمل کی اہمیت کو بیان کرنے کے لیے الفاظ ناکافی ہیں۔وزارتِ داخلہ کے تحت آنے والے ہر ادارے کا ملک کی سلامتی اور عوامی انتظام و انصرام میں کلیدی کردار ہے۔چاہے وہ پولیس ہو،ایف آئی اے،پاسپورٹ اور امیگریشن کے ادارے ہوں،نادراہو یا دیگر ادارے؛ان کی کارکردگی براہِ راست قومی سلامتی،قانون کے نفاذ اور شہریوں کی روزمرہ زندگی پر اثر انداز ہوتی ہے۔لہذا،مجموعی سیکیورٹی ماحول کو مستحکم کرنے کے لیے ان کی صلاحیت اور کارکردگی کو بہتر بنانا ناگزیر ہے۔پہلی ترجیح ان اداروں میں میرٹ کی بنیاد پر بھرتیوں کو یقینی بنانا ہونی چاہیے۔بامقصد اصلاحات کے لیے ایسے افراد کا انتخاب ضروری ہے جو شفاف طریقے سے میرٹ پر منتخب ہوں اور مطلوبہ مہارتوں اور پیشہ ورانہ قابلیت کے حامل ہوں۔اسی طرح،واضح اور قابلِ پیمائش اہداف کا تعین اور ان کے حصول کے لیے حتمی ٹائم لائنز (اوقاتِ کار)مقرر کرنا بھی انتہائی اہم ہے۔تبدیلی کا عمل غیر معینہ مدت تک جاری رہنے والا عمل نہیں ہو سکتا۔ہر ادارے کو معلوم ہونا چاہیے کہ اس سے کیا توقعات وابستہ ہیں،اسے کب تک اہداف حاصل کرنے ہیں اور اس کی کارکردگی کا جائزہ کیسے لیا جائے گا۔دیگر وزارتوں کو بھی اسی طرزِ عمل کی پیروی کرنی چاہیے۔حکومت کی کارکردگی کا انحصار بالآخر اس کے محکموں کی فعالیت اور کارکردگی پر ہوتا ہے۔اگر ہر وزارت واضح اہداف،ٹائم لائنز،احتساب کے نظام اور نتائج پر مبنی کلچر کو اپنائے تو عوامی خدمات کی فراہمی پر اس کے اثرات بہت نمایاں ہو سکتے ہیں۔
پروپیگنڈا بھارت کی عادت
بھارت کی قیادت نے پاکستان کے خلاف پروپیگنڈے کو ریاستی پالیسی کا ایک مستقل جزو بنا لیا ہے۔نئی دہلی،قابلِ اعتماد ثبوت پیش کیے بغیر،بار بار پاکستان پر بے بنیاد الزامات عائد کرتا ہے تاکہ ملک کو بدنام کیا جا سکے اور خطے میں بیانیے کو زہر آلود کیا جا سکے۔بارہا بے نقاب ہونے کے باوجود، بھارتی قیادت پاکستان کے خلاف زہر اگلنے سے باز نہیں آتی۔بھارتی وزیر داخلہ امیت شاہ نے حال ہی میں دعوی کیا کہ سیکیورٹی ایجنسیوں نے بھارت کی 14 ریاستوں میں کارروائی کے دوران پاکستان سے منسلک 200 سے زائد مبینہ دہشت گرد کارندوں کو گرفتار کیا ہے۔انہوں نے الزام لگایا کہ گرفتار ہونے والے افراد کا تعلق’شہزاد بھٹی نیٹ ورک’نامی گروہ سے تھا اور دعوی کیا کہ ان گرفتاریوں سے تخریبی حملوں کی منصوبہ بندی کو ناکام بنایا گیا ہے۔تاہم،جیسا کہ ایسے دعووں کے معاملے میں اکثر ہوتا ہے،پاکستان کے ملوث ہونے کو ثابت کرنے والا کوئی ثبوت پیش نہیں کیا گیا۔ہمارے دفتر خارجہ نے بجا طور پر ان الزامات کو مسترد کر دیا۔دفتر خارجہ کے ترجمان طاہر اندرابی نے ان دعووں کو پاکستان کے خلاف ایک مذموم مہم کا حصہ قرار دیا جس کا مقصد ملکی سطح پر سیاسی مفادات کا حصول ہے۔انہوں نے بھارت کے اپنے جبر،دہشت گردی اور عدم استحکام پھیلانے والی سرگرمیوں کے ریکارڈ کی طرف بھی درست نشاندہی کی اور کہا کہ بھارت کی بے بنیاد باتیں عالمی توجہ کو بھارت کے اپنے طرزِ عمل سے نہیں ہٹا سکتیں۔حقیقت یہ ہے کہ بھارت مسلسل خود کو دہشت گردی کا شکار ظاہر کرنے کی کوشش کرتا ہے،جبکہ اس کا اپنا ریکارڈ یہ ثابت کرتا ہے کہ وہ خود دہشت گردی کا مرتکب ہے۔پاکستان نے بارہا بھارت کی جانب سے پاکستان کو غیر مستحکم کرنے کے لیے دہشت گردانہ سرگرمیوں کی حمایت اور مالی معاونت کے ثبوت فراہم کیے ہیں۔بھارت کی سرحد پار غیر قانونی سرگرمیوں کا ریکارڈ بھی عالمی جانچ پڑتال کے دائرے میں آیا ہے،جس میں کینیڈا میں سکھ رہنما ہردیپ سنگھ نجر کا قتل اور اس سازش میں بھارتی ایجنٹوں کے ملوث ہونے کے الزامات شامل ہیں۔اب وقت آگیا ہے کہ عالمی برادری بھارت کے طرزِ عمل کا سنجیدگی سے نوٹس لے۔اسے دہشت گردی،تخریب کاری اور سرحد پار جرائم کے لیے جوابدہ ٹھہرایا جانا چاہیے۔نئی دہلی کا پروپیگنڈا بھلے ہی بار بار دہرایا جائے،لیکن محض دہرانے سے الزامات حقائق میں تبدیل نہیں ہو جاتے۔دنیا کو بھارت کی اشتعال انگیز بیان بازی سے آگے دیکھنا چاہیے اور ثبوت،شفافیت اور احتساب کا مطالبہ کرنا چاہیے۔
اردوان کی سفارتی کوششیں
ترکیے کے صدر رجب طیب اردوان نے ایک بار پھر سفارت کاری پر زور دیا ہے اور امریکی صدر ڈونلڈ ٹرمپ سے ٹیلی فونک گفتگو میں اپیل کی ہے کہ وہ ایران کے ساتھ بات چیت جاری رکھیں اور کشیدگی کم کرنے کے لیے ہر ممکن کوشش کریں۔انہوں نے امن کی بحالی کے لیے کی جانے والی کوششوں میں اپنی حمایت کی پیشکش بھی کی۔اردوان کی اس مداخلت کا وقت انتہائی اہم ہے۔واشنگٹن اور تہران کے درمیان بات چیت تعطل کا شکار ہے،جبکہ امریکہ نے جنگ بندی میں توسیع کے امکان کو مسترد کر دیا ہے۔دریں اثنا، ایران نے خبردار کیا ہے کہ اگر سفارت کاری ناکام ہو جاتی ہے تو وہ مکمل جارحانہ عسکری مقف اختیار کر سکتا ہے۔اس غیر یقینی صورتحال نے اسٹریٹجک اعتبار سے انتہائی اہمآبنائے ہرمزسے ہونے والی جہاز رانی کو بھی متاثر کیا ہے۔اس پس منظر میں،بات چیت کے لیے اردوان کا مطالبہ قابلِ ستائش ہے۔ترکی ایک منفرد مقام رکھتا ہے؛اس کی سرحد ایران سے ملتی ہے جبکہ واشنگٹن کے ساتھ بھی اس کے قریبی تعلقات ہیں۔وہ خطے کے دیگر اہم فریقین کے ساتھ بھی رابطے میں رہا ہے اور کشیدگی میں مزید اضافے کے بجائے مسلسل سفارت کاری کی وکالت کرتا رہا ہے۔اس صورتحال میں ترکی کی اہمیت نیٹو(NATO)کے ایک کلیدی رکن اور اتحاد کی سب سے بڑی افواج میں سے ایک کی مالک ہونے کی وجہ سے بھی ہے۔مغربی طاقتوں اور علاقائی ممالک،دونوں کے ساتھ رابطے برقرار رکھنے کی صلاحیت انقرہ کو ایسے وقت میں ایک اہم سفارتی کردار عطا کرتی ہے جب کشیدگی خطرناک حد تک بڑھ چکی ہے۔لہذا،اردوان کی یہ سرگرمی ترکی کے قریبی پڑوس سے کہیں زیادہ اہمیت کی حامل ہے اور اس ذمہ داری کی عکاسی کرتی ہے جو اتنے بڑے بحران کے دوران بااثر ریاستوں کو نبھانی چاہیے۔دیگر اہم دارالحکومتوں کو بھی،خاص طور پر انہیں جن کا واشنگٹن، تہران اور وسیع تر خطے میں اثر و رسوخ ہے،آگے آنا چاہیے۔مقصد واضح ہونا چاہیے: رابطے کے ذرائع کھلے رکھے جائیں،مکمل جنگی کارروائیوں کی طرف واپسی روکی جائے اور ایک پائیدار سیاسی تصفیے کے لیے ضروری گنجائش پیدا کی جائے۔اس معاملے میں بہت کچھ دا پر لگا ہوا ہے۔ایران اور امریکہ کے درمیان لڑائی کا دوبارہ آغاز انتہائی خطرناک ہوگا اور اس سے خطے میں وسیع پیمانے پر عدم استحکام پیدا ہوگا،تجارت اور توانائی کے اہم راستوں کو خطرہ لاحق ہوگا اور معاشی غیر یقینی صورتحال میں اضافہ ہوگا۔کوئی بھی ملک، بشمول وہ ممالک جو مشرقِ وسطی سے بہت دور واقع ہیں،اس کے اثرات سے محفوظ نہیں رہ سکے گا۔اس نازک موڑ پر،سفارتی اثر و رسوخ رکھنے والے ممالک کو آگے آنا چاہیے اور اس بات کو یقینی بنانے میں اپنا بھرپور کردار ادا کرنا چاہیے کہ فریقین دوبارہ لڑائی کی طرف نہ مڑیں بلکہ پائیدار امن کی جانب پیش قدمی کریں۔