ایران پر منڈلاتا جوہری تباہی کا سایہ

تاریخ کا المیہ یہ ہے کہ اقتدار کے ایوانوں میں کئے گئے بعض فیصلوں کی قیمت آنیوالی نسلوں کو ادا کرنا پڑتی ہے۔ سیاسی انا، عالمی بالادستی کی خواہش اور طاقت کے اظہار کا جنون جب حکمت و تدبر پر غالب آ جائے تو اس کے نتائج محض چند ممالک تک محدود نہیں رہتے بلکہ پوری انسانیت کو اپنی لپیٹ میں لے سکتے ہیں۔ آج امریکہ اور ایران کے درمیان کشیدگی کے تناظر میں ایک ایسا ہی سوال عالمی ضمیر کو جھنجھوڑ رہا ہے: کیا صدر ڈونلڈ ٹرمپ داخلی سیاسی دبا یا وسط مدتی انتخابات میں ناکامی کے بعد ایران کے خلاف جوہری ہتھیار استعمال کرنے جیسا انتہائی قدم اٹھا سکتے ہیں؟ اگرچہ اس خدشے کی تائید میں کوئی مستند ثبوت موجود نہیں، تاہم موجودہ عالمی صورتِ حال میں اس امکان کا جائزہ لینا ضروری ہے، کیونکہ اس کے مضمرات محض مشرقِ وسطی نہیں بلکہ پوری دنیا کے مستقبل سے وابستہ ہیں۔روایتی فوجی کارروائی اور جوہری جنگ میں بنیادی فرق ہے۔ امریکہ کے پاس ایران کی فوجی تنصیبات کو نشانہ بنانے کی غیر معمولی صلاحیت موجود ہے، لیکن جوہری ہتھیاروں کا استعمال ایک ایسی سرخ لکیر عبور کرنے کے مترادف ہوگا جس کے بعد حالات پر قابو رکھنا کسی کیلئے آسان نہیں رہے گا۔ امریکی نظام میں جوہری ہتھیار استعمال کرنے کا اختیار بڑی حد تک صدر کے پاس ہے اور اس کیلئے کانگریس کی پیشگی منظوری لازمی نہیں۔ یہی وجہ ہے کہ صدارتی فیصلے میں سیاسی جذبات کے بجائے غیر معمولی ذمہ داری اور دوراندیشی درکار ہوتی ہے۔ انتخابی شکست یا سیاسی مقبولیت میں کمی لاکھوں انسانوں کی زندگیوں کو خطرے میں ڈالنے کا جواز نہیں بن سکتی۔ ایران 1945 کا جاپان نہیں۔ اس کی وسیع سرزمین، بڑی آبادی، دشوار گزار جغرافیہ اور علاقائی فوجی اثرورسوخ اسے ایک اہم قوت بناتے ہیں۔ خلیج فارس اور آبنائے ہرمز کے قریب اس کا محلِ وقوع عالمی توانائی کی ترسیل کیلئے بھی غیر معمولی اہمیت رکھتا ہے۔ اگر اس پر جوہری حملہ ہوتا ہے تو تباہی کسی ایک فوجی تنصیب یا شہر تک محدود نہیں رہے گی۔ شہری ہلاکتوں، تابکاری کے پھیلا اور بنیادی ڈھانچے کی تباہی کے ساتھ ایران کی ممکنہ جوابی کارروائیاں پورے خطے کو ایک وسیع جنگ میں دھکیل سکتی ہیں۔ اسرائیل، امریکی فوجی اڈے اور خلیجی ممالک بھی اس تصادم کی زد میں آ سکتے ہیں۔اس بحران کا ایک فوری اثر عالمی معیشت پر پڑے گا ۔ آبنائے ہرمز میں جہاز رانی متاثر ہونے سے تیل کی عالمی ترسیل میں تعطل پیدا ہو سکتا ہے، جس کے نتیجے میں قیمتیں بڑھیں گی، توانائی مہنگی ہوگی اور مہنگائی کی نئی لہر جنم لے گی۔ ترقی پذیر ممالک جو پہلے ہی قرضوں اور معاشی مشکلات سے نبرد آزما ہیں، اس صورتِ حال کا زیادہ بوجھ برداشت کرینگے۔ پاکستان کیلئے یہ خطرہ کہیں زیادہ براہِ راست نوعیت کا ہوگا۔ ایران کے ساتھ مشترکہ سرحد اور عرب خلیجی ممالک سے گہرے معاشی و سفارتی تعلقات پاکستان کو ایک حساس تزویراتی صورتحال میں لا کھڑا کریں گے۔ اسلام آباد کو اپنے قومی مفادات کا تحفظ کرتے ہوئے تمام فریقوں کے ساتھ متوازن تعلقات برقرار رکھنا ہوں گے۔ کسی ایک فریق کے عسکری مقف کا حصہ بننے کے بجائے پاکستان کو امن، خودمختاری اور علاقائی سالمیت کے اصولوں کی حمایت کرنی چاہیے۔ واشنگٹن، تہران، ریاض اور بیجنگ سمیت اہم دارالحکومتوں کے ساتھ سفارتی رابطے اس ضمن میں موثر کردار ادا کر سکتے ہیں ۔ معاشی طور پر بھی پاکستان ایسے بحران کا متحمل نہیں ہو سکتا۔ عالمی منڈی میں تیل کی قیمتوں میں اضافہ درآمدی بل اور زرمبادلہ کے ذخائر پر دبا بڑھائے گا، جبکہ بجلی، ٹرانسپورٹ اور صنعتی پیداوار مہنگی ہونے سے عام آدمی کی زندگی مزید دشوار ہو سکتی ہے۔ اس کے علاوہ خلیجی ممالک میں مقیم لاکھوں پاکستانیوں کا روزگار اور تحفظ بھی متاثر ہونے کا خدشہ ہوگا۔ ان کی ترسیلاتِ زر پاکستان کی معیشت اور لاکھوں خاندانوں کی گزر بسر کا اہم سہارا ہیں۔ یوں مشرقِ وسطی میں شروع ہونے والا بحران پاکستان کے گھروں تک معاشی پریشانی کی صورت میں پہنچ سکتا ہے۔ پاکستان سمیت پڑوسی ممالک کو ماحولیاتی نگرانی اور صحتِ عامہ کے تحفظ کیلئے پیشگی تیاری کرنا ہوگی ۔ تابکاری کسی سرحدی لکیر کو نہیں پہچانتی اور نہ ہی اس کے اثرات سیاسی اختلافات کا لحاظ کرتے ہیں۔تاریخ کے اوراق میں 6 اور 9 اگست 1945 ہمیشہ انسانی المیے کی علامت رہیں گے۔ ان دنوں امریکہ نے جاپان کے شہروں ہیروشیما اور ناگاساکی پر ایٹم بم گرائے ۔ چند لمحوں میں آبادیاں ملبے کا ڈھیر بن گئیں، ہزاروں انسان فوری طور پر ہلاک ہوئے اور بعد کے برسوں میں بے شمار افراد تابکاری سے پیدا ہونیوالی بیماریوں کا شکار ہو کر جان سے گئے۔ 1945 کے اختتام تک دونوں شہروں میں مجموعی ہلاکتیں دو لاکھ سے تجاوز کر چکی تھیں ۔ مرخین آج بھی بحث کرتے ہیں کہ آیا جاپان کو ہتھیار ڈالنے پر مجبور کرنے کیلئے ان حملوں کی ضرورت تھی یا نہیں۔ آج کے حالات 1945 سے کہیں زیادہ پیچیدہ ہیں۔ جدید میزائل ٹیکنالوجی ، علاقائی اتحاد، جوہری دفاعی توازن اور عالمی معیشتوں کا باہمی انحصار کسی بھی بڑے تصادم کو بین الاقوامی بحران میں تبدیل کر سکتا ہے۔ ایران پر جوہری حملہ دوسرے ممالک کو بھی اپنے دفاعی اور جوہری عزائم پر نظرثانی کرنے پر مجبور کر سکتا ہے، جس سے جوہری عدم پھیلا کا عالمی نظام شدید کمزور ہو جائے گا۔ اس لیے پاکستان سمیت تمام جوہری قوتوں کیلئے ضروری ہے کہ وہ اس اصول کو مضبوط کریں کہ جوہری ہتھیار سیاسی دبا یا دھمکی کا ذریعہ نہیں بلکہ انتہائی غیر معمولی حالات میں بھی آخری دفاعی حد تصور کیے جانے چاہئیں۔ پاکستان کو اقوامِ متحدہ اور عالمی جوہری توانائی ایجنسی کے ذریعے بھی سفارتی کوششوں کی حمایت کرنی چاہیے تاکہ کشیدگی مذاکرات کی طرف لوٹے۔ عالمی طاقتوں کو یہ سمجھنا ہوگا کہ کسی ملک کو عسکری طور پر زیر کرنے کی خواہش اور خطے میں پائیدار امن قائم کرنے کی کوشش دو مختلف راستے ہیں۔ طاقت کا بے احتیاط استعمال وقتی برتری تو دے سکتا ہے، مگر اس کے نتائج پوری دنیا کو بھگتنا پڑتے ہیں ۔بالآخر اصل سوال یہ نہیں کہ امریکہ ایران پر جوہری حملہ کر سکتا ہے یا نہیں، بلکہ یہ ہے کہ کیا اکیسویں صدی کی دنیا نے ہیروشیما اور ناگاساکی سے کوئی سبق حاصل کیا ہے؟