وفاقی وزیر تعلیم کا بڑا دعویٰ، عمران خان کو ریسکیو کرنے والے افراد معطل

وفاقی وزیر تعلیم رانا تنویر حسین نے بیان جاری کیا ہے جس ریسکیو ورکر نے عمران خان کو فرسٹ ایڈ دی اسے معطل کیا جا رہا ہے، ریسکیو ورکر کا کہنا ہے عمران خان کی ٹانگ پر معمولی سا زخم تھا۔
تفصیلات کے مطابق شیخوپورہ میں میڈیا سے گفتگو کرتے ہوئے رانا تنویرحسین نے کہا کہ فلاپ لانگ مارچ سے نکلنے کیلئے عمران خان نے حملے کا ڈرامہ رچایا، قوم کی عمرانی فتنے سے جان چھوٹنے والی ہے، عمران خان کا جھوٹ بےنقاب ہو چکا، عوام نے اسے مسترد کر دیا ہے۔
رانا تنویر حسین نے کہا کہ عمران خان پنجاب، کے پی، گلگت بلتستان کے وسائل کا استعمال کر رہا ہے، زمان پارک لاہور میں کے پی اور گلگت بلتستان کی پولیس تعینات ٍکی گئی ہے۔
وفاقی وزیر نے کہا کہ وزیر آباد ڈرامہ بے نقاب ہوگا، وزیراعظم نے جوڈیشل کمیشن کیلئے خط لکھ دیا ہے، وزیر آباد میں جو نوجوان جاں بحق ہوا وہ عمران خان کے گارڈ کی فائرنگ کا نشانہ بنا۔
رانا تنویر نے کہا کہ نواز شریف اسی سال واپس آئیں گے۔