سندھ حکومت کے محکمہ کھیل اور امور نوجوانان نے فٹبال ورلڈ کپ کے سیمی فائنل اور فائنل میچ شائقین کو بڑی اسکرینوں پر دکھانے کا فیصلہ کیا ہے۔
ورلڈ کپ 2026 میں سیمی فائنل لائن اپ مکمل ہو گیا ہے، فرانس، اسپین، انگلینڈ اور ارجنٹائن نے آخری چار میں اپنی جگہ بک کر لی ہے۔
سندھ کے وزیر کھیل اور امور نوجوانان سردار محمد بخش خان مہر نے بتایا کہ کراچی کے ضلع ملیر میں سیمی فائنلز 15 اور 16 جولائی کو نشر کیے جائیں گے جبکہ فائنل میچ 20 جولائی کو شرافی گوٹھ کے یوتھ ڈویلپمنٹ سینٹر میں دکھایا جائے گا۔
انہوں نے کہا کہ سیمی فائنل اور فائنل میچز شہید بینظیر آباد، لاڑکانہ، حیدرآباد اور میرپورخاص میں بھی بڑی اسکرینوں پر دکھائے جائیں گے۔
صوبائی وزیر کھیل نے کہا کہ سیمی فائنل اور فائنل دونوں میچز سکھر کے میونسپل اسٹیڈیم میں بڑی اسکرین پر نشر کیے جائیں گے جبکہ فائنل میچ روہڑی فٹبال گراؤنڈ میں دکھایا جائے گا۔
انہوں نے مزید بتایا کہ تینوں میچ سپورٹس کمپلیکس گھوٹکی میں بڑی سکرین پر دکھائے جائیں گے جبکہ ٹھٹھہ سپورٹس کمپلیکس میں صرف فائنل میچ نشر کیا جائے گا۔
سندھ کے وزیر کھیل نے کہا کہ حکومت نوجوانوں میں کھیلوں اور صحت مندانہ سرگرمیوں کے فروغ کے لیے اقدامات کر رہی ہے۔
انہوں نے اس بات پر زور دیا کہ فیفا ورلڈ کپ جیسے عالمی ایونٹس کو دیکھنے سے کھیلوں کے فروغ کو تقویت ملے گی، نوجوانوں کا جوش و جذبہ بڑھے گا اور صوبے میں فٹ بال کلچر کو مزید فروغ ملے گا۔
تبصرے (0)
اپنا تبصرہ لکھیں