یومِ اقبال: اقبال کا خواب اور آج کا پاکستان

9 نومبر کا دن ہماری قومی تاریخ میں ایک خاص اہمیت رکھتا ہے۔ یہ وہ دن ہے جب ہم اس عظیم مفکر، شاعر اور فلسفی کو یاد کرتے ہیں جس نے اپنی فکر، شاعری اور بے لوث قومی جذبے سے برصغیر کے مسلمانوں کو ایک نئی سوچ، نیا حوصلہ اور ایک الگ پہچان دی۔ ڈاکٹر علامہ محمد اقبال صرف ایک شاعر نہیں تھے بلکہ وہ ایک ایسے دور اندیش رہنما تھے جنہوں نے اپنے دور کے حالات کو سمجھتے ہوئے ایک ایسے مستقبل کا تصور پیش کیا جہاں مسلمان اپنی تہذیب، ثقافت، عقیدے اور الگ قومی حیثیت کے ساتھ زندگی گزار سکیں۔ اقبال کا پیغام کسی ایک زمانے، ایک نسل یا ایک قوم تک محدود نہیں تھا۔ ان کی شاعری میں خودی کا فلسفہ، خود اعتمادی، محنت، علم، عمل اور بلند کردار کا درس ملتا ہے۔ انہوں نے مسلمانوں کو غفلت کی نیند سے جگانے کی کوشش کی اور انہیں یاد دلایا کہ زندگی صرف حالات کے سامنے سر جھکا دینے کا نام نہیں بلکہ اپنی صلاحیتوں کو پہچان کر اپنی منزل کی طرف بڑھنے کا نام ہے۔ آج جب ہم یومِ اقبال منا رہے ہیں تو سب سے بڑا سوال یہ ہے کہ کیا ہم نے اقبال کے افکار کو اپنی قومی اور ذاتی زندگی کا حصہ بنایا ہے؟ کیا ہم نے ان کے خواب کو سمجھنے کی کوشش کی ہے؟ یا ہم ہر سال 9 نومبر کو چند تقریبات، تقاریر، ادبی نشستوں اور سوشل میڈیا پر پیغامات شیئر کرنے کے بعد اپنی روزمرہ زندگی میں واپس لوٹ جاتے ہیں؟ حقیقت یہ ہے کہ اقبال کو صرف یاد کرنا کافی نہیں بلکہ انہیں سمجھنا اور ان کے پیغام پر عمل کرنا ضروری ہے۔ اقبال نے جس خودی کا تصور پیش کیا تھا، اس کا مطلب تکبر یا دوسروں کو کمتر سمجھنا نہیں بلکہ اپنی ذات کو پہچاننا، اپنے کردار کو بلند کرنا اور اپنی صلاحیتوں کو بہتر مقاصد کے لیے استعمال کرنا ہے۔ ان کے نزدیک وہی قوم ترقی کرتی ہے جو اپنے نوجوانوں کو سوچنے، سوال کرنے، علم حاصل کرنے اور نئے راستے تلاش کرنے کا حوصلہ دیتی ہے۔ اقبال کا پیغام ہمیں احساس دلاتا ہے کہ کسی بھی قوم کی ترقی کا انحصار صرف وسائل پر نہیں بلکہ اس کے افراد کی سوچ، کردار اور عملی جدوجہد پر ہوتا ہے۔اقبال کا پاکستان کا خواب بھی اسی سوچ کا حصہ تھا۔ وہ برصغیر کے مسلمانوں کو سیاسی، سماجی اور تہذیبی طور پر ایک الگ مستقبل کی طرف دیکھنے کا حوصلہ دینا چاہتے تھے۔ 1930 کے خطبہ الہ آباد میں انہوں نے مسلمانوں کیلئے ایک الگ سیاسی وحدت کا تصور پیش کیا، جو بعد میں تحریکِ پاکستان کی فکری بنیاد کا ایک اہم حصہ بنا۔ آج پاکستان ایک حقیقت ہے، لیکن اس حقیقت کو مضبوط، خوشحال اور ترقی یافتہ بنانا اب ہماری ذمہ داری ہے۔ افسوس کے ساتھ کہنا پڑتا ہے کہ آج ہمارا معاشرہ کئی ایسے مسائل کا شکار ہے جو اقبال کے افکار سے دوری کا پتا دیتے ہیں۔ تعلیم کا معیار، بے روزگاری، سفارش اور ناانصافی، اداروں میں بدانتظامی، سیاسی عدم استحکام، معاشی پریشانیاں اور سماجی تفریق ہمارے قومی سفر میں بڑی رکاوٹیں ہیں۔ ہم ترقی کی بات تو کرتے ہیں لیکن عملی طور پر اپنی ذمہ داریوں سے بچنے کی کوشش بھی کرتے ہیں۔ ہم بہترین نظام کی خواہش رکھتے ہیں مگر اپنے کردار اور رویوں کو بہتر بنانے پر کم توجہ دیتے ہیں۔ اقبال نے نوجوان کو خصوصی اہمیت دی۔ ان کی نظر میں نوجوان کسی بھی قوم کا سب سے قیمتی سرمایہ ہوتا ہے۔ وہ نوجوانوں کو بلند حوصلے، مضبوط ارادے اور خود اعتمادی کا پیغام دیتے تھے۔ آج پاکستان کی بڑی آبادی نوجوانوں پر مشتمل ہے۔ یہ نوجوان اگر تعلیم، سائنس، ٹیکنالوجی، تحقیق، ہنر اور تعمیری سوچ کو اپنا لیں تو پاکستان کے مستقبل کو بدلا جا سکتا ہے۔ لیکن اس کے لیے ضروری ہے کہ ہم اپنی نسل کو صرف ڈگری حاصل کرنے تک محدود نہ رکھیں بلکہ انہیں علم کے ساتھ کردار، تحمل، سچائی اور ذمہ داری کا درس بھی دیں۔ اقبال کا ایک بڑا پیغام عمل تھا۔ وہ صرف خواب دیکھنے کے قائل نہیں تھے بلکہ خوابوں کو حقیقت میں بدلنے کیلئے محنت اور مسلسل کوشش کو ضروری سمجھتے تھے۔ ہمارے ہاں اکثر قومی ترقی کی ذمہ داری حکومتوں ، سیاسی رہنمائوں اور اداروں پر ڈال دی جاتی ہے ، جبکہ ایک ذمہ دار شہری کے طور پر ہر شخص کا اپنا کردار بھی اتنا ہی اہم ہے۔ ایک استاد ایمانداری سے تعلیم دے، ایک طالب علم دل لگا کر پڑھے، ایک سرکاری ملازم اپنی ڈیوٹی کو امانت سمجھے، ایک تاجر دیانت داری سے کاروبار کرے اور ایک حکمران عوام کے حقوق کو اپنی ذمہ داری سمجھے تو معاشرے میں حقیقی تبدیلی آ سکتی ہے۔ اقبال نے قومی یکجہتی اور ملت کے اتحاد پر بھی زور دیا۔ آج ہمیں ضرورت ہے کہ ہم ذاتی مفادات، فرقہ وارانہ سوچ، علاقائی تفریق اور سیاسی مخالفت سے اوپر اٹھ کر پاکستان کو اپنی مشترکہ پہچان سمجھیں۔ اختلافِ رائے کسی بھی زندہ معاشرے کا حصہ ہوتا ہے، لیکن اختلاف کو دشمنی میں بدل دینا قومی ترقی کیلئے نقصان دہ ہے۔ اقبال کی تعلیمات ہمیں ایک ایسے معاشرے کی طرف بلاتی ہیں جہاں علم، انصاف، برداشت اور خودداری کو بنیادی اہمیت حاصل ہو۔ ہمیں ایسے تعلیمی ماحول کی ضرورت ہے جہاں طلبہ کو صرف کتابی معلومات نہ دی جائیں بلکہ انہیں عملی زندگی کے مسائل سمجھنے اور ان کے حل تلاش کرنے کے قابل بھی بنایا جائے۔ ہمیں یہ بھی تسلیم کرنا ہوگا کہ کسی قوم کی عزت اور ترقی کا تعلق اس کے اجتماعی کردار سے ہوتا ہے۔جب معاشرے میں جھوٹ، بددیانتی، اقربا پروری اور قانون شکنی عام ہو جائے تو ترقی کے دعوے کھوکھلے محسوس ہونے لگتے ہیں۔ اقبال نے انسان کو بلند کردار اور خودداری کا درس دیا۔ ضرورت اس بات کی ہے کہ نوجوان اپنی توانائیاں تعمیری سرگرمیوں، علم، تحقیق اور مثبت مکالمے میں صرف کریں۔ اقبال کا شاہین بلند پرواز کی علامت ہے۔ اس کا پیغام یہی ہے کہ نوجوان اپنی سوچ اور مقصد کو بلند رکھیں اور مشکلات کے سامنے ہمت نہ ہاریں۔ یومِ اقبال ہمیں صرف ماضی کی یاد نہیں دلاتا بلکہ مستقبل کے حوالے سے ہماری ذمہ داریوں کا احساس بھی دلاتا ہے۔ یہ دن ہم سے سوال کرتا ہے کہ ہم نے اپنے وطن کو مضبوط بنانے کیلئے کیا کردار ادا کیا؟ ہم نے نئی نسل کو کیا دیا؟ کیا ہم نے اپنے اداروں کو بہتر بنانے، انصاف کے نظام کو مضبوط کرنے اور معاشرے میں مثبت تبدیلی لانے کیلئے کوئی عملی قدم اٹھایا؟ضرورت اس امر کی ہے کہ یومِ اقبال کو محض ایک رسمی تقریب کے بجائے قومی تجدیدِ عہد کا دن بنایا جائے۔ تعلیمی اداروں میں اقبال کے افکار کو سمجھنے اور ان پر بحث کرنے کا ماحول پیدا کیا جائے۔ نوجوانوں کو ان کی شاعری کے ساتھ ان کے فلسفے سے بھی روشناس کرایا جائے اور حکومتی سطح پر ایسی پالیسیاں بنائی جائیں جو تعلیم، تحقیق، روزگار اور قومی ترقی کو فروغ دیں۔ علامہ اقبال نے جس پاکستان کا خواب دیکھا تھا، اس کی حقیقی تعبیر صرف نعروں اور تقریبات سے ممکن نہیں۔ اس کے لیے ہمیں اپنے کردار، سوچ اور عمل میں تبدیلی لانا ہوگی۔ ہمیں یہ فیصلہ کرنا ہوگا کہ ہم ایک ایسی قوم بننا چاہتے ہیں جو صرف اپنے ماضی پر فخر کرے یا ایسی قوم جو اپنے حال کو بہتر بنا کر مستقبل کو روشن کرے۔ 9 نومبر ہمیں یہی پیغام دیتا ہے کہ اقبال کو خراجِ عقیدت پیش کرنے کا بہترین طریقہ ان کے افکار کو اپنی زندگی میں شامل کرنا ہے۔ اگر ہم خودی، خودداری، علم، اتحاد، محنت اور عمل کو اپنا شعار بنا لیں تو یقینا ہم اس خواب کی تعبیر کے قریب پہنچ سکتے ہیں جس کیلئے ہمارے بزرگوں نے جدوجہد کی تھی۔ اقبال آج بھی ہمارے درمیان اپنے اشعار، افکار اور پیغام کی صورت میں زندہ ہیں، لیکن اصل سوال یہ نہیں کہ اقبال ہمارے دلوں میں زندہ ہیں یا نہیں، اصل سوال یہ ہے کہ کیا ان کا پیغام ہماری عملی زندگی میں بھی زندہ ہے؟ کیونکہ قوموں کی تقدیر صرف خواب دیکھنے سے نہیں بدلتی، بلکہ ان خوابوں کو حقیقت بنانے کے لیے مسلسل جدوجہد کرنا پڑتی ہے۔ یہی اقبال کا پیغام ہے اور یہی یومِ اقبال کا حقیقی مقصد ہونا چاہیے۔