کربلا کا ابدی پیغام

تاریخِ انسانی میں بعض واقعات محض ایک تاریخی واقعہ نہیں رہتے بلکہ وہ زمان و مکان کی حدود سے ماورا ہو کر ایک عالمگیر پیغام اور دائمی فکر کی صورت اختیار کر لیتے ہیں۔ واقع کربلا بھی ایسا ہی ایک عظیم اور بے مثال واقعہ ہے جس نے نہ صرف اسلامی تاریخ بلکہ پوری انسانیت کے اجتماعی شعور پر گہرے نقوش ثبت کیے ہیں۔ کربلا حق و باطل، عدل و ظلم، حریت و جبر اور اصول و مفاد کے درمیان ایک ایسی فیصلہ کن معرکہ آرائی تھی جس نے یہ ثابت کر دیا کہ باطل خواہ کتنا ہی طاقتور کیوں نہ ہو، حق کی آواز کو ہمیشہ کیلئے دبایا نہیں جا سکتا۔ نواس رسول حضرت امام حسین اور ان کے جانثار رفقا کی عظیم قربانی قیامت تک انسانیت کے لیے ایک مینار نور کی حیثیت رکھتی ہے۔ 61 ہجری میں میدانِ کربلا میں پیش آنے والا سانحہ دراصل اقتدار کی جنگ نہیں تھا بلکہ یہ اسلام کی حقیقی روح، پیغمبرِ اسلام حضرت محمد ۖ کی تعلیمات اور انسانی اقدار کے تحفظ کی جدوجہد تھی۔ حضرت امام حسین نے اپنے نانا حضرت محمد ۖ کے دین میں آنے والی سیاسی، اخلاقی اور فکری انحرافات کو محسوس کرتے ہوئے اس بات کا ادراک کر لیا تھا کہ اگر ظلم، جبر اور ملوکیت کے نظام کو چیلنج نہ کیا گیا تو اسلام کی حقیقی روح مسخ ہو جائے گی۔ یہی وجہ تھی کہ آپ نے یزید کی بیعت سے انکار کرتے ہوئے وہ تاریخی اعلان کیا جو رہتی دنیا تک آزادی پسند انسانوں کے لیے مشعلِ راہ رہے گا۔حضرت امام حسین کی جدوجہد کا بنیادی فلسفہ یہ تھا کہ اللہ تعالی کے سوا کسی ظالم، جابر اور غیر عادل قوت کے سامنے سرِ تسلیم خم نہیں کیا جا سکتا۔ آپ نے دنیا کو یہ درس دیا کہ ہر دور کے یزید کے سامنے جھکنے کے بجائے حق، صداقت اور انصاف کیلئے ڈٹ جانا ہی ایک مومن کی حقیقی شان ہے۔ آپ نے واضح کیا کہ اصولوں پر سمجھوتہ وقتی مفادات تو دے سکتا ہے لیکن تاریخ میں عزت اور سربلندی صرف انہی کے حصے میں آتی ہے جو سچائی کیلئے قربانی دیتے ہیں۔ امام حسین کا یہ پیغام آج بھی پوری انسانیت کیلئے اتنا ہی موثر اور زندہ ہے جتنا چودہ سو برس قبل تھا۔ حضرت امام حسین نے مدینہ سے روانگی کے وقت اور پھر مکہ مکرمہ سے کربلا کی جانب سفر کے دوران متعدد مواقع پر واضح فرمایا کہ ان کا مقصد اقتدار حاصل کرنا نہیں بلکہ اپنے نانا حضرت محمد ۖ کی امت کی اصلاح کرنا، نیکی کا حکم دینا اور برائی سے روکنا ہے۔ آپ نے فرمایا کہ میں ظلم، فساد اور جبر کے نظام کو قبول نہیں کر سکتا۔ یہی وہ عظیم فلسفہ ہے جو واقع کربلا کو محض ایک مذہبی سانحے کے بجائے ایک عالمگیر انسانی تحریک بنا دیتا ہے ۔ میدانِ کربلا میں حضرت امام حسین کے ساتھ صرف بہتر نفوس تھے جن میں اہلِ بیت کے افراد، بزرگ، نوجوان، بچے اور جانثار اصحاب شامل تھے۔ ان عظیم ہستیوں نے اپنی جانوں کا نذرانہ پیش کرتے ہوئے وفا، ایثار، صبر اور استقامت کی ایسی لازوال مثال قائم کی جس کی نظیر تاریخ میں کم ہی ملتی ہے۔ حضرت عباس کی وفاداری، حضرت علی اکبر کی شجاعت، حضرت قاسم کی جوانمردی، حضرت حبیب بن مظاہر کی استقامت اور دیگر اصحابِ حسین کی قربانیاں انسانی تاریخ کا روشن باب ہیں۔ چھ ماہ کے معصوم حضرت علی اصغر کی شہادت ظلم کی انتہا اور حق کی سربلندی کی ایسی علامت ہے جو ہر حساس دل کو جھنجھوڑ دیتی ہے۔کربلا ہمیں یہ بھی سکھاتی ہے کہ حق کی راہ میں تعداد نہیں بلکہ نظریہ، اخلاص اور عزم اہم ہوتے ہیں۔ ایک طرف ہزاروں کا لشکر تھا جس کے پاس طاقت ، وسائل اور اقتدار تھا جبکہ دوسری طرف حق کا ایک مختصر قافلہ تھا۔ لیکن تاریخ نے ثابت کیا کہ فتح ہمیشہ حق اور اصولوں کی ہوئی۔ آج دنیا میں یزید کا نام ظلم، جبر اور استبداد کی علامت ہے جبکہ امام حسین کا نام عزت، حریت اور حق پسندی کا استعارہ بن چکا ہے۔حضرت امام حسین کی قربانی کا پیغام صرف مسلمانوں تک محدود نہیں بلکہ پوری انسانیت کیلئے ہے ۔ دنیا کی تاریخ میں آزادی، انسانی حقوق اور ظلم کیخلاف جدوجہد کرنیوالی بیشمار تحریکوں نے واقع کربلا سے رہنمائی حاصل کی۔ برصغیر کے آزادی پسند رہنمائوں سے لیکر دنیا کے مختلف خطوں میں انسانی آزادی کیلئے جدوجہد کرنے والے کارکنوں تک، سب نے کسی نہ کسی صورت میں امام حسین کی فکر سے روشنی حاصل کی ہے۔ مہاتما گاندھی نے بھی اعتراف کیا تھا کہ انہوں نے ہندوستان کی آزادی کی جدوجہد میں امام حسین کی قربانی سے سبق سیکھا ۔آج کی دنیا میں جب ظلم، جبر، استحصال، انسانی حقوق کی پامالی اور طاقت کے ناجائز استعمال کے واقعات عام ہیں، واقع کربلا کی معنویت مزید بڑھ جاتی ہے۔ کربلا ہمیں یہ سکھاتی ہے کہ ظلم کے خلاف خاموشی بھی ایک جرم ہے۔ اگر معاشرے کے باشعور اور صاحبِ کردار افراد ظلم کے سامنے خاموش رہیں تو باطل قوتیں مزید طاقتور ہو جاتی ہیں۔ حضرت امام حسین نے اپنے عمل سے یہ ثابت کیا کہ اصولوں اور حقائق پر مبنی موقف اختیار کرنا ہی حقیقی ایمان اور انسانی عظمت کی علامت ہے۔آج کے سیاسی، سماجی اور اخلاقی بحرانوں میں بھی ہمیں کربلا کے پیغام کو سمجھنے کی ضرورت ہے۔ قیادت کا اصل معیار اقتدار، دولت یا طاقت نہیں بلکہ کردار، دیانت، عدل اور عوام کی خدمت ہے۔ امام حسین نے اپنی جان قربان کرکے قیادت کے اعلیٰ ترین اصول متعین کر دیے۔ انہوں نے ثابت کیا کہ ایک حقیقی رہنما اپنے اصولوں، اپنے نظریات اور اپنے عوام کے حقوق پر کبھی سمجھوتہ نہیں کرتا ۔ اسی طرح انسانی حقوق کے کارکنوں، جمہوریت پسندوں، سماجی مصلحین اور آزادی کے متوالوں کیلئے بھی کربلا ایک دائمی سرچشم ہدایت ہے۔ ظلم کے خلاف جدوجہد، کمزوروں کے حقوق کا تحفظ، انصاف کا قیام اور انسانی وقار کی بحالی وہ اقدار ہیں جن کی بنیاد امام حسین نے اپنے خون سے مضبوط کی۔ کربلا کا پیغام یہ ہے کہ حق کی خاطر قربانی دینا کبھی رائیگاں نہیں جاتا۔حضرت امام حسین اور ان کے رفقا کی قربانیوں نے یہ حقیقت ہمیشہ کے لیے واضح کر دی کہ باطل قوتیں وقتی طور پر غالب آ سکتی ہیں لیکن تاریخ کا فیصلہ ہمیشہ حق کے حق میں ہوتا ہے۔ کربلا ایک ایسی تحریک ہے جو ہر دور کے انسان کو اپنے ضمیر کی آواز سننے، ظلم کے خلاف کھڑے ہونے اور اصولوں پر ثابت قدم رہنے کا درس دیتی ہے۔آج ضرورت اس امر کی ہے کہ ہم محض رسمی طور پر واقع کربلا کو یاد کرنے کے بجائے اس کے حقیقی پیغام کو اپنی انفرادی اور اجتماعی زندگیوں میں نافذ کریں۔ اگر ہم حضرت امام حسین کے فلسف حیات کو اپنالیں، ظلم اور ناانصافی کیخلاف آواز بلند کریں، سچائی اور انصاف کا ساتھ دیں اور اللہ تعالیٰ کے سوا کسی کے سامنے سر نہ جھکائیں تو ہم ایک بہتر، منصفانہ اور پرامن معاشرہ تشکیل دے سکتے ہیں۔واقع کربلا دراصل انسانیت کے ضمیر کی بیداری کا نام ہے۔ یہ ہمیں سکھاتا ہے کہ اصولوں، حق اور سچائی پر کبھی سمجھوتہ نہیں کرنا چاہیے، خواہ اس کیلئے کتنی ہی بڑی قربانی کیوں نہ دینی پڑے۔ حضرت امام حسین اور ان کے رفقا کی عظیم قربانی قیامت تک انسانیت کیلئے مشعلِ راہ، آزادی کا استعارہ اور حق و صداقت کی لازوال علامت بنی رہے گی۔