صرف پیپلزپارٹی کے پاس غربت ، بیروزگاری ، مہنگائی سے نمٹنے کا منصوبہ ہے ، بلاول

پیپلز پارٹی کے چیئرمین بلاول بھٹو زرداری نے کہا ہے کہ پیپلز پارٹی واحد جماعت ہے جس کے پاس غربت، بے روزگاری اور مہنگائی سے نمٹنے کا منصوبہ ہے۔اپنے ایک بیان میں ان کا کہنا ہے کہ آج راولپنڈی کے لیاقت باغ میں پارٹی منشور اور عوامی اقتصادی معاہدے پر بات کروں گا، عوام کو لیاقت باغ جلسہ میں شامل ہونے کی دعوت دیتا ہوں۔بلاول بھٹو زرداری کا کہنا ہے کہ یہ وہی شہر ہے جہاں ذوالفقار علی بھٹو کو قتل کیا گیا تھا اور اسی پارک میں بے نظیر بھٹو نے اپنی آخری تقریر کی تھی۔ان کا مزید کہنا تھا کہ آئیں عہد کریں کہ ان کے ادھورے مشن کو پورا کریں گے، نفرت اور تقسیم کی سیاست کو ختم کریں گے۔چیئرمین پیپلز پارٹی بلاول بھٹو زرداری کا بھی کہنا ہے کہ پرامن، خوشحال اور ترقی پسند پاکستان بنائیں گے، جو ہم سب کا پاکستان ہوگا۔